Bankada FRETILIN Sei Hein Orientasaun Hosi Lideransa FRETILIN

DILI, 05 maiu 2020 (TATOLI)—Bankada Frente Revolionária Timor-Leste Independente (FRETILIN) sei hein orientasaun lideransa partidu kona-ba bankada CNRT husu hamutuk ho partidu refere tuur hamutuk hakotu impase polítiku iha rai-laran.
Xefe Bankada FRETILIN, Aniceto Guterres hateten, nia parte sei hein desizaun polítika hosi lideransa FRETILIN tanba to’o oras ne’e seidauk iha orientasaun polítika ruma.
“Ne’e depende ba desizaun partidu ida-idak nian. Se sira (CNRT) hakarak hakotu impase polítiku, partidu seluk ita la konsidera ne’e halo nusá. Se hakarak inkluzaun atu halo saida. Ne’e lideransa partidu sira mak kontaktu malu. Se laiha orientasaun, ha’u labele hatán,” Xefe Bankada FRETILIN, Deputadu Aniceto Guterres, informa ba jornalista sira iha Parlamentu Nasionál, tersa ne’e.
Xefe Bankada FRETILIN ne’e konsidera apelu CNRT nian kona-ba husu PR atu bolu Partidu FRETILIN no CNRT atu solusiona impase politíku ne’e foin mak lansa, tanba ne’e nia parte labele komenta klaru liu.
“Ha’u mós Vise-Prezidente FRETILIN to’o agora seidauk iha kontaktu ruma. Partidu deside ami halo tuir. Kuandu seidauk, ami labele komenta sasán sira hanesan ne’e,” dehan Aniceto Guterres.
Notísia Relevante: Bankada CNRT Husu PR Bolu FRETILIN no CNRT Solusiona Impase Polítiku
Jornalista : Evaristo Soares Martins
Editór : Cancio Ximenes

