DILI, 06 maiu 2020 (TATOLI) – Ministru Negósiu Estranjeiru no Kooperasaun, Dionísio da Costa Babo Soares, informa katak Governu liuhosi Konsellu Ministru finaliza ona mekanizmu sira ligadu ho atribuisaun subsídiu ba estudante timor-oan naun bolseiru sira iha rai-li’ur.
Mekanizmu ba atribuisaun subsídiu ne’e Governu estabelese liuhosi kriasaun Dekretu-Lei ida ne’ebé mak hetan ona aprovasaun iha Konsellu Ministru.
“Kona-ba subsídiu ba estudante naun bolseiru ninia mekanizmu hotu ona no Governu liuhosi Konsellu Ministru aprova ona Dekretu-Lei hein para públikasaun de’it”, relata Ministru Dionísio liuhosi konferénsia imprensa ne’ebé hala’o iha Salaun Ministériu Finansa, Aitarak-laran, kuarta ne’e.
Governante ne’e salienta, kona-ba determinasaun valór ba kada estudante mós finaliza ona no hein Dekretu-Lei hetan promulgasaun maka Konsellu Jestaun realiza fali reuniaun hodi halo aprovasaun hodi hahú atribui ona subsídiu ba estudante sira iha rai-li’ur.
“Kona-ba valór ba estudante depende nível vida katak iha Eropa labele hanesan ho iha Indonézia, maibé ita hein de’it kuandu loos ona mak ita haree ninia valór tanba nível vida nasaun ida la hanesan ho nasaun seluk la hanesan”, nia subliña.
Jornalista: Antónia Gusmão
Editora: Julia Chatarina
