DILI, 07 maiu 2020 (TATOLI)-Governu liuhosi Sala Situasaun Sentru Integradu Jestaun Krize (CIGC-sigla portugés) iha ona planu sei transforma Kuarentena Tasi-Tolu no Tibar hodi sai fatin izolamentu ba atende kazu surtu COVID-19 iha Timor-Leste.
Koordenadór Destakamentu Reasaun Rapida, Aurelio Guterres informa, iha faze daruak nian, CIGC konsentra ba izolamentu la’ós kuarentena.
“Tibar ho Tasi-Tolu agora daudaun ita transforma ba oin sai fatin izolamentu tanba ita tama iha segundu periodu ita hotu konsentra ba iha izolamentu la’ós kuarentenaa ona tanba fasilidade sira sei trasforma ba iha izolamentu nian,” dehan Aurelio Guterres, hafoin lidera enkontru ho ekipa task force ne’ebé trata asuntu dezenvolvimentu fasilidade infraestrutura, iha CCD ohin.
Ekipa servisu oras ne’e hadia daudaun hari’i fatin iha fatin izolamentu Vera Cruz Dili, Kuarentena Tasi-Tolu, Tibar, Maliana no Covalima.
“Enkontru lokraik ne’e ita konsentra ba iha fasilidade izolamentu nian entaun husi Vera Cruz nafatin izolamentu maibé haree liu ba kazu grave no Tasi-Tolu haree liu ba kazu lijeiru tanba fatin ne’e ami prepara 400 to’o 500,”tenik Eis Ministru Negósiu Estranjeiru no Kooperasaun.
Jornalista : Felicidade Ximenes
Editór : Agapito dos Santos
