DILI, 12 maiu 2020 (TATOLI)-Prezidente Assosiasaun Enfermeiru Timor-Leste, Joaquin Gregorio Carvalho, louva ho prestasaun servisu husi enfermeiru Timoroan sira tanba fó ona dedikasaun hodi atende populasaun durante implementasaun estadu emerjénsia ne’ebé ligadu ho problema surtu COVID-19.
Nia hato’o asuntu ne’e relasiona ho selebrasaun loron mundiál enfermeiru ne’ebé maka mundu tomak selebra inklui Timor-Leste iha tersa (12/05/2020)
”Tanba ne’e mak AETL husu ba Enfermeiru hotu-hotu atu kontinua servisu ho profisionál no tane a’as kódigu ontolojia,” apela, Joaquin Gregorio Carvalho ba Jornalista Sira, durante konferénsia imprensa, iha Postu Saúde Maloa, ohin.
Relasiona ho komemorasaun loron mundiál enfermeiru iha aban, Prezidente AETL ne’e husu ba Governu liuhosi Ministériu Saúde atu konsidera loron mundiál ne’e tanba tinan 2020, Organizasaun Saúde Mundiál konsidera nu’udar tinan enfermeiru no parteira nian.
”Ami mós ejize ba Estadu ho Governu atu tau atensaun ba seguransa enfermeiru nian liliu ekipamentu sira hanesan protesaun pesoál nian hodi halo atendimentu ba ema moras sira ho COVID-19,” nia akresenta liután.
Tuir lista AETL iha ona membru hamutuk 1.700-resin, maibé sira ne’ebé maka koloka iha liña oin hodi atende problema surtu coronavirus iha Timor-Leste hamutuk 1.026, maibé númeru ida ne’e seidauk konta ho enfermeiru sira ne’ebé servisu iha Ajénsia no Instituisaun privada sira.
“Ami hanesan parseiru ba Ministériu saúde nia ami hato’o saida mak ami konsidera no presiza hetan atensaun husi Ministériu saúde se karik laiha resposta ruma, ami AETL nafatin halo komunikasaun ho Ministériu Saúde para bele haree ba asuntu sira ne’ebé mak sai hanesan isu ba iha Assosiasaun Enfermeiru Timor- Leste,”katak nia.
Jornalista : Felicidade Ximenes
Editór : Agapito dos Santos
