DILI, 26 maiu 2020 (TATOLI) – Asosiasaun Tane Konsumidór konsidera períodu Estadu Emerjénsia (EE) importante atu evita propagasaun surtu COVID-19 husi nasaun viziñu, liuliu iha Timór Osidentál ne’ebé daudaun númeru konfirmadu aumenta ba bebeik, maibé presiza mós garante servisu públiku esensiál hanesan telekomunikasaun.
Tane nota katak durante ne’e servisu públiku esensiál ne’ebé kontempla iha medida sira ne’ebé Governu foti ba ezekusaun EE, tuir Dekretu Governu Númeru 3/2020, 28 marsu, iha artigu 26º maka garante prestasaun saúde, servisu transporte, servisu seguransa, servisu protesaun sivíl, servisu ba bee no saneamentu, servisu ba produsaun, transporte, eletresidade, servisu ba kontrolu tráfiku aéreu no servisu foti foer.
Maibé iha artigu 26º, númeru 1, la kontempla servisu públiku esensiál ba telekomunikasaun, liuliu liga ba fornesimentu servisu internet no komunikasaun nian.
“Iha Estadu Emerjénsia, ema hotu hela iha uma no servisu iha uma, inklui estudante sira estuda husi uma, implika ita-nia sidadaun sira uza servisu públiku telekomunikasaun hodi halo servisu no estuda. Sorin seluk, iha períodu ne’e limite mobilidade no hatún rendimentu ba família sira inklui halo konsumidór sira aumenta despezas atu uza servisu públiku esensiál hanesan telekomunikasaun”, refere nota husi Tane Konsumidór ne’ebé Agência Tatoli asesu iha tersa ne’e.
Tanba ne’e, asosiasaun advokasia ba konsumidór ne’e konsidera Governu presiza hola medida ba servisu públiku esensiál iha área telekomunikasaun hodi fó subsídiu ba família sira durante períodu EE.
“Kualkér desizaun ne’ebé mak Estadu foti, presiza garante ba servisu públiku esensiál ba konsumidór sira nian, tanba ne’e hanesan prinsípiu konstitusionál no universál ne’ebé Estadu tenke garante ba ninia populasaun”, nota ne’e subliña.
Nune’e mós, Tane Konsumidór husu Governu atu tau atensaun ba servisu públiku ba sasán importasaun, hanesan nesesidade bázika: ai-han, kombustível ba produsaun servisu enerjia elétrika iha Hera no Bentano, fasiidade saúde sira no materiál sira ne’ebé hatama husi rai-li’ur.
“Iha situasaun Estadu Emerjénsia tanba hare ba númeru COVID-19 iha ita-nia rai viziñu, liliu Timór Osidentál, Indonézia ninia numeru aumenta ba bebeik, iha sorin seluk, servisu públiku esensiál barak maka depende husi importasaun rai-li’ur”, akresenta.
Asosiasaun ne’e husu ba Governu atu tau matan ba investimentu públiku, liuliu ba produsaun lokál sira liuhosi kontinua fó subsídiu ba produsaun no mós subsídiu ba agrikultór ka produtór sira, inklui insentivu konsumidór sira konsome produtu lokál ne’ebé saudável, orgániku no folin ne’ebé asesível ba konsumidór sira.
Ikus liu, Tane Konsumidór husu Governu garante seguransa no reforsa fasilidade iha odomatan tama Timor-Leste liuhosi rai-maran, tasi no lalehan.
Nune’e mós, asosiasaun ne’e konsidera Governu presiza halo kontrola ba komunidade nafatin, nune’e bele tuir nafatin protokolu ne’ebé implementa husi Ministériu Saúde no Organizasaun Munis Saúde, hanesan distansiamentu sosiál, uza máskara, fase liman bebeik, hasa’e kapasidade kuarantena no halo vijilánsia sentinela.
Jornalista: Natalino Costa
Editora: Julia Chatarina
