PNTL Halo Apreensaun ba Motór 65
DILI, 02 juñu 2020 (TATOLI) – Komandu Polísia Nasionál Timor-Leste (PNTL), Unidade Tránzitu, tersa (02/06/2020), halo operasaun no apreensaun ba motorizada privadu no estadu nian hamutuk 65 ne’ebé kontra dekretu lei kódigu estrada 48/2018.
Notísia Relevante : Kazu Krime Redús iha Ámbitu Estadu Emerjénsia
Motór hirak ne’e polísia halo apreensaun iha área Palacio do Governo nian, tanba durante ne’e, polísia halo ona sosializasaun lei kódigu Estrada ba funsionáriu no públiku hotu atu la bele para iha trotoar area Palacio do Governo nian.
Tuir lei katak bainhira motor na’in atu foti fali sira-nia motór tenke ba foti nota auto-infrasaun hodi ba selu koima ba estadu hamutuk $9.00 ba kada motór.
“Ami kumpre regra ne’ebé polísia sosializa, maibé fatin para provizóriu laiha, tanba ne’e, ami para de’it motór iha trotoar-leten,” dehan Funsionáriu Públiku, Pinto Alves iha Komandu PNTL, Caicoli, Dili.
Nia husu ba governu bele kria estasionamentu permanente ida bele fasilita funsionáriu públiku sira ne’ebé serbisu iha Palacio do Governo atu bele para sira nia motór ho karreta.
Responde ba preokupasaun ne’e, Komandante Polísia Munisípiu Dili, Superintendente Xefe, Armando Monteiro, klarifika katak, polísia halo apreensaun ne’e bazeia ba orden husi Komandu PNTL hodi kontrola movimentu transporte sira atu kumpre regra no labele viola lei kódigu estrada.
Armando Monteiro hatutan, atu kria fatin estasionamentu iha área Palacio do Governo nian ne’e kompeténsia ba governu nian, tanba PNTL hala’o serbisu bazeia ba lei hodi bandu kualkér motorista atu para motór ka karreta iha trotoar leten liu-liu área Palacio do Governo nian.
“Ha’u hanoin hanesan servidór estadu, ita-nia funsionáriu sira tenke kumpre lei,” afirma Armando Monteiro.
Komandante Armando hatutan, lei kódigu estrada ne’e PNTL sosializa beibeik ona, tanba ne’e ba motorista sira ne’ebé kontinua kontra tenke selu multa.
Jornalista : Eugénio Pereira
Editór : Francisco Simões
