DILI, 10 juñu 2020 (TATOLI) – Governu liuhosi reuniaun Konsellu Ministru (KM) aprova Projetu Rezolusaun rua, ne’ebé aprezenta husi Primeiru-Ministru, Taur Matan Ruak, hodi nomeia Arsénio Paixão Bano asume kargu Prezidente Autoridade (PA) Rejiaun Administrativu Espesiál Oé-cusse Ambeno (RAEOA) no Zona Ekonomia Espesiál Sosiál Merkadu, Timor-Leste (ZEESM,TL) no ezonera atuál Prezidente Autoridade José Luís Guterres ‘Lugu’.
“Konsellu Ministru ohin aprova ezonerasaun ba Prezidente Autoridade Rejiaun Administrativa Espesiál Oé-cusse Ambeno hodi nomeia Arsénio Paixão Bano atu lidera fali,” informa Ministru ba Prezidénsia Konsellu Ministru, Fidelis Manuel Leite Magalhães hafoin reuniaun ezekutivu iha Palásiu Governu, kuarta ne’e.
Notísia Relevante: Hetan Pose, Prezidente RAEOA Foun Promete Sei Rezolve Kestaun Bázika Moris Populasaun
Kona-ba PA RAEOA foun nia loron hahú servisu efetivu, Ministru Fidelis dehan Governu sei haree hafoin rezolusaun ne’e publika iha Jornál Repúblika.
“Ha’u la ko’alia polítika maibé normalmente kompeténsia tomak iha desizaun Konsellu Ministru,” nia akresenta.
Iha tersa (09/06), hafoin hasoru malu ho PM Taur iha Palásiu Governu, Arsénio Paixão Bano hateten prontu atu lidera RAEOA bainhira hetan Fiar husi Governu sentrál, liuliu PXefe Governu.
Iha loron 01 agostu 2019, Arsénio asume kna’ar nu’udar PA RAEOA-ZEESM,TL interinu durante loron 120, hafoin mandatu eis PA, Marí Alkatiri ramata iha loron 30 jullu 2019.
Iha mandatu PA Marí Alkatiri, Arsénio asume kna’ar hanesan Sekretáriu Rejionál iha Oé-cusse.
Lugu simu pose nu’dar PA RAEOA-ZEESM,TL iha loron 13 novembru 2019 ba mandatu tinan-lima.
Antes asume PA foun, Governu nomeia Lugu sai Embaixadór Timor-Leste ba Konfederasaun Suiça, maibé Prezidente Repúblika seidauk dekreta.
Jornalista: Florêncio Miranda Ximenes
Editora: Julia Chatarina
