DILI, 01 jullu 2020 (TATOLI) – Banku Sentrál Timor-Leste (BCTL, sigla portugés) deside enserramentu kompañia National Insurance Timor-Leste,S.A, (NITL) ne’ebé la rejista ona iha baze dadus iha Servisu Rejistrasaun no Verifikasaun Emprezariál, Institutu Públiku (SERVE, IP).
Tuir nota impresa husi BCTL ne’ebé Agência Tatoli asesu iha kuarta ne’e, fó sai katak iha loron 29 juñu 2020, Banku Sentrál hakarak hato’o ba públiku katak iha loron 3 fevereiru 2020 SERVE hasai karta aberta númeru 22359/2020 kona-ba dissolusaun ka enseramentu NITL.
Bazeia ba karta ne’e, hahú husi loron refere NITL ofisialmente la eziste ona iha merkadu finanseiru (seguru jerál) iha teritóriu Timor-Leste.
“Karta aberta ne’e hanesan ho BCTL ninia desizaun kona-ba revokasaun lisensa no relatóriu finál Administradór Espesiál,” refere nota ne’e.
NITL hanesan Kompañia dahuluk ne’ebé rejistu hanesan merkadu finaseiru iha Repúblika Demorátika Timor-Leste ho lisensa hanesan autoridade bankária no pagamentu iha Timor-Leste.
Iha 10 marsu 2010, NITL sai hanesan seguru jerál dahuluk lisensiada iha Timor-Leste ho baze ba artigu 12, parágrafu 5, iha Lei ba Seguru númeru 06/2005, kona-ba rejime ba Lisensiamentu, Supervizaun no Regulasaun ba kompañia Seguru no Intermediáriu Seguru, husi autoridade bankária no pagamentu sira iha Timor-Leste, ne’ebé aprova hodi emite lisensa ba NITL atu hala’o operasaun hanesan kompañia seguru jerál iha Timor-Leste.
Kompañia ne’e oferese produtu ne’ebé abranjente sira hanesan merkadu finaseiru no servisu hanesan konsultória manajementu ho risku ba empreza sira no individu.
NITL mós ein korpora visaun globál hodi diversifika atu adapta solusaun ba empreza lokál sira.
Jornalista: Florêncio Miranda Ximenes
Editora: Julia Chatarina
