DILI, 03 jullu 2020 (TATOLI) – Primeiru-Ministru (PM), Taur Matan Ruak, konsidera lei ne’ebé di’ak tenke adapta ba realidade nasaun.
“Ha’u sempre dehan ba asesor sira katak lei ne’ebé di’ak, mínimu priense kritéria tenke ajuda ita rezolve problema no bainhira la ajuda ita rezolve problema entaun presiza muda, nune’e mós tenke adapta realidade ita-nia. Labele uza fali lei ida iha Portugál dala-ruma sira la uza ona mai aplika fali iha Timór,” tenik PM Taur iha ámbitu enkontru preparasaun Loron Nasionál Funsaun Públika ba daneen ne’ebé hala’o iha salaun Ministériu Finansa, Aitarak-Laran, sesta ne’e.
Tanba ne’e tuir Xefe Governu, presiza halo reforma judisiária atu muda lei sira ne’ebé la adapta ona ho realidade Timór nian.
“Presiza halo reforma judisiária ba ita-nia lei sira ne’ebé dala-ruma iha problema boot, tanba ita la hatene portugés, ita-nia asesór sira balun copy paste de’it halo ita ulun fatuk moras hotu,” akresenta.
Eis Prezidente Repúblika ne’e mós husu ba lejizladór sira atu akompaña mós asesór jurídiku sira, bainhira halo lei ida karik bele responde ba realidade nasaun nian, tanba bainhira la akontese maka aban bainrua nasaun bele sai laboratóriu dezperénsia ba sira ne’ebé matenek.
“Kriteria seluk mak lei ne’e tenke ajuda ita integra ita nia-an iha rejiaun no mundu, lei sira ne’e mós labele kria dúvida, no labele liu interpretasaun ida. Tanba ne’e maka ha’u dehan ba seguransa jurídika sira katak importante maka tenke muda ita-nia lei sira, ne’ebé ba dahuluk tenke hatene polítika ita-nia ne’e saida?,” nia subliña.
Jornalista: Antónia Gusmão
Editora: Julia Chatarina
