DILI, 23 jullu 2020 (TATOLI) – Relasiona ho aniversáriu Agência Tatoli ba dala-haat ne’ebé sei monu 27 jullu, Ministru Asuntu Parlamentár no Komunikasaun Sosiál, Francisco Jerónimo, enkoraja atu ezisténsia nu’udar mídia Estadu tenke marka diferensa no sai referénsia entre entidade sira seluk ne’ebé hala’o serbisu iha meiu komunikasaun sosiál.
“Ha’u nafatin fó korajen ba Tatoli atu la’o nafatin ba oin no marka nafatin diferensa liuliu iha infomasaun no notísia tenke iha oin ho kredível, loos, akuradu no rapidéz atu sai referénsia ba mídia sira seluk hodi defende interese Estadu Timor-Leste,” tenik Ministru Francisco ba Agência Tatoli, iha ninia knaar fatin, Palásiu Governu, kinta ne’e.
Ministru Francisco mós hata’o parabéns ba aniversáriu Tatoli ne’ebé hahú ho embriaun, maibé transforma-an ona ba Insitutu Públiku.
Antes ne, mídia ne’ebé divulga informasaun liuhosi plataforma online ne’e hanaran Agência Noticiosa de Timor-Leste (ANTIL) maibé hafoin desizaun Konsellu Ministru, muda naran ba Agência Tatoli.
“Ami fó parabéns ba Tatoli, hein katak ho tinan haat ne’e bele haree filafali saida mak seidauk di’ak hodi hadi’a nafatin neneik, maibé bebeik to’o objetivu. Ha’u hakarak iha tinan-haat ne’e no ba tinan oin mai tan sai di’ak liután atu rápidu iha divulgasaun notísia ne’ebé iha kualidade no garantidu katak notísia ne’e loos,” nia sujere.
Durante akompaña notísia, governante ne’e nota katak servisu Agência Tatoli la’o ona ho di’ak, maski sei presiza hadi’a buat balun tan atu sai mídia Estadu ne’ebé ho karáter no espesialidade loos atu sai referénsia.
Ministru dehan, iha orsamentu 2020 no 2021, Ministériu Asuntu Parlamentár no Komunikasaun Sosiál (MAPKOMS) sei dezenvolve liután Tatoli ne’ebé foku ba infraestutura bázika atu iha edifísiu permanente ida atubele fasilita halo serbisu di’ak liután.
Jornalista: Florêncio Miranda Ximenes
Editora: Julia Chatarina
