DILI, 24 jullu 2020 (TATOLI) – Relasiona ho aniversáriu Agência Tatoli ba dala-haat, Ministru Transporte Komunikasaun, José Agostinho da Silva, husu ba mídia Estadu ne’e atu kontinua oferese informsaun ho kualidade ba públiku, nune’e bele sai refénsia ba ema hotu.
“Ha’u-nia sujestaun maka Agência Tatoli bele kontinua transmite informasaun ne’ebé maka ho kualidade ba públiku, nune’e ita-nia populasaun sira mós bele asesu informasaun kona-ba lala’ok Governu ninian, liuliu akompaña progresu serbisu liña ministériu ho di’ak liután,” dehan Ministu José Agostinho ba Agência Tatoli, foin lalais ne’e, iha Palásiu Governu.
Biban ne’e, Ministru mós husu ba jornalista mídia online ne’e atu kontinua hatudu profisionalizmu ba divulgasaun informasaun sira, nune’e nafatin sai matan no tilun ba povu.
“Parabéns ba ita bo’ot sira, kontinua profisionaliza-an iha ita bo’ot sira-nia knaar hodi kaer metin prinisípiu kontrolu sosiál, sai matan no tilun ba povu tomak,” governante ne’e enkoraja.
Nu’udar membru Governu, nia nota durante ne’e Agência Tatoli nia progresu di’ak tebes, liuliu ba publikasaun notísia maibé presiza hadi’a kestaun balun.
“Husu ita bo’ot sira halo di’ak liután serbisu ne’ebé iha ona, nune’e ba oin bele iha melloramentu liután,” subliña Ministru José Agostinho.
Jornalista: Natalino Costa
Editora: Julia Chatarina
