DILI, 24 jullu 2020 (TATOLI)—Bankada parlamentár Congresso Nacional da Reconstrução de Timor (CNRT) propoin Expedito Dias Ximenes no Bankada Frente Revolucionária de Timor-Leste Independente (FRETILIN) mantein Paulo Adriano da Cruz.
Liuhosi reuniaun líder bankada, ohin, aprova ona ajenda ne’e no fiksa ona data eleisaun ba membru Conselho de Imprensa (CI) iha segunda, 27 jullu 2020. Iha reuniaun líder bankada ne’e partisipa hosi reprezentante Governu nian atuál Ministru Asuntu Parlamentár no Komunikasaun Sosiál, Francisco Jerónimo.
Notísia Relevante: Virgílio Guterres: Mandatu CI Apoiu Jornalista Sira
“Ajenda eleisaun ba reprezentasaun Parlamentu Nasionál nian fiksa ba dia 27 jullu ne’e. Tuir lista iha kandidatu na’in-haat (4), hosi CNRT propoin señor Expedito Dias Ximenes, hosi UDT/FM propoin señora Deonaia da Silva Pereira, agora PLP aprezenta señor Jordão Antero Marques no hosi FRETILIN propoin señor Paulo Adriano da Cruz. Kandidatu haat (4) ne’e mak sei submete ba eleisaun iha segunda-feira,” Sekretária Meza Parlamentu Nasionál, Deputada Lídia Norberta dos Santos Martins, informa ba jornalista sira, iha Parlamentu Nasionál, sesta ne’e.
Tuir lei Komuniasaun Sosiál nú 5 /2014, 19 novembru, Kapítulu VII estabelse Konsellu Imprensa (CI-sigla portugés), artigu 42 (Natureza no Independénsia), alínea 1, hateten Konsellu Imprensa nu’udar entidade administrativu independente no hala’o ninia atribuisaun no mós kompeténsia la haktuir diretrís ka orientasaun sira podér polítiku nian.
Nune’e mós artigu 45 hosi Lei Komunikasaun kona-ba Kompozisaun Konsellu Imprensa hamutuk membru na’in-lima, ne’ebé atu hili liuhosi dalan tuir-mai:
- a) Reprezentante jornalista na’in-rua ne’ebé sira hili tiha ona liuhosi eleisaun;
- b) Reprezentante órgaun komunikasaun sosiál ida, ne’ebé órgaun sira hili tiha ona liuhosi eleisaun;
- c) Sidadaun na’in-rua ne’ebé ho kapasidade be ema hotu hatene no iha méritu profisionál ho preferénsia ne’ebé hatutan ba komunikasaun sosiál, hosi sira na’in-rua ida nu’udar jurista, ne’ebé Parlamentu Nasionál hili.
- d) Membru sira Konsellu Imprensa hili entre sira ninia Prezidente.
Artigu 47 hosi Lei Komunikasaun Sosiál (Estatutu membru sira-nian) alínea 1 hateten bainhira membru Konsellu Imprensa hala’o knaar sei tau-hamutuk ho ezersísiu atividade profisionál ne’ebé hanesan, sei la selu nein fó subsídiu osan no la iha karatér permanente.
Alínea 2 hosi artigu ne’e fundamenta, membru sira Konsellu Imprensa iha direitu ba seña prezensa tuir termu ne’ebé ninia estatutu sei estabelese karik.
Entretantu, liuhosi konferensia, parte Timor-Leste Press Union (TLPU) hili ona reprezentasaun jornalsita, Francisco Belo simões da Costa liuhosi konferénsia ne’ebé realiza hosi Conselho de Imprensa, nune’e mós Asosiasaun Jornalista Timor-Leste (AJTL) hili ona Virgílio Guterres no hela de’it reprezentante media na’in sira mak seidauk klaru.
Jornalista : Evaristo Soares Martins
Editór : Cancio Ximenes
