Grupu Teatru Filteda Dezenvolve Talentu Juventude Iha Area Teatru no Filme
DILI, 28 jullu 2020 (TATOLI)-Autór Grupu Teatru Filteda, Silvano Rodrigues Xavier, hateten, ezisténsia sira-nia grupu ho nia vizaun ka hanoin ne’ebé inspira oinsá dezenvolve talentu juventude sira-nian iha area teatru no filme.
Silvano Rogrigues Xavier haktuir signifikasaun hosi naran Filteda iha oin tolu katak, filme, teatru no tebedai no grupu refere estabelese iha tinan 2019 ne’ebé funda hosi nia parte hamutuk ho joven timoroan na’in-tolu seluk ne’ebé antes ne’e hala’o estudu espesífiku iha area refere. Grupu ne’e rasik daudaun iha ona ninia membru na’in-20-resin.
Nia tenik, durante ezisténsia grupu teatru Filteda ninia atividade foku ba formasaun teatru, filme no tebedai ba juventude sira liuhosi ninia sentru ne’ebé harii iha Munisípiu Baucau.
“Kona-ba ema hira mak tuir ona formasaun ida ne’e ha’u bele dehan númeru sei kiik, maibé programa kapasitasaun ne’e ho nia objetivu oinsá kapasita talentu juventude sira-nian ne’ebé iha interese atu dezenvolve liután,” hateten Autór Grupu Teatru Filteda Silvano Rodrigues Xavier ba Agência Tatoli hafoin aprezenta teatru ,iha ámbitu komemorasaun aniversáriu Agência Tatoli nian ba dahaat ne’ebé hala’o iha salaun Ian Martin, Infordepe, Balide, Dili, segunda horiseik.
Liuhosi komemorasaun aniversáriu Tatoli nian ne’e, nia mós husu mídia estatál ne’e oinsá bele abranje kobertura hodi divulga inisiativa juventude sira-nian iha area kultura hanesan teatru, filme no tebedai hodi promove tanba importante tebes hodi ema bele hatene liután hodi kontribui ba paz.
Silvano Rodrigues hateten, kapasitasaun ne’ebé sira hala’o bainhira juventude ne’ebé iha interese atu aprende kona-ba acting teatru.
Tuir nia, mezmu filme mundu iha Timor-Leste seidauk la’o, maibé acting teatru la’o ona pasa fali ba filme fasil loos, tanba sai autór teatru ba filme fasil.
Nia dehan, kona-ba Tebedai hanesan dansa kultura Timoroan oinsá promove, aléinde juventude sira aprende oinsá prodús filme no broadcasting journalism.
Durante ne’e sira-nia parte foku liubá teatru sira aprezenta hanesan ligadu ho istória rezisténsia nian, promosaun direitu labarik, igualdade jéneru no seluk tan, ne’ebé hetan oportunidade mós aprezenta iha serimónia ruma.
Nia hateten, ba oin sira-nia parte sei kria livru ida liuhosi obra Teatru Filtera nune’e iha futuru bainhira iha mundu akademia teatru ka arte iha ona livru ne’e bele kontribui ba iha akademia.
Grupu Teatru Filteda durante ne’e hala’o atividade sira ho inisiativa rasik no seidauk hetan apoiu ruma hosi governu ka doadór, maibé hetan de’it apoiu liu hosi autoridade Munisípiu Baucau mak oferese fatin hodi fasilita atividade sira.
Nia husu ba governu liuhosi Sekretáriu Estadu Arte no Kultura, oinsá bele apoiu sira-nia grupu tanba liga ba iha arte kultura hodi promove liután no ba Sekretaria Estadu Komunikasaun Sosiál atu tau matan liu-liu kona-ba parte ekipamentu.
Jornalista : Nelson de Sousa
Editór : Francisco Simões
