DILI, 17 agostu 2020 (TATOLI)—Meza prezidénsia foun to’o ona iha Parlamentu Nasionál hodi troka meza ne’ebé deputadu CNRT baku fila ka halo rahun iha 19 maiu 2020. Meza refere kompañia timoroan ida-nian mak halo liuhosi prosesu loke Request for Quotation ho dezeñu meza ne’ebé la hanesan.
Notísia Relevante: Deputadu CNRT Baku-Fila Meza Prezidente Parlamentu Nasionál
“Meza tolu ne’e depois mós haree tán kadeira tolu. Nia kustu hamutuk $4.2 mill. Ne’e kompañia ida mak halo. Ami loke RFQ (Reguest for Quotation) sira mai aplay. Ha’u la lembra nia naran maibé iha Comoro. Meza ne’e timoroan sira mak halo. Dezeñu mós la hanesan entaun prezidente parlamentu nian ho vise-prezidente na’in-rua nian nia (kustu) la hanesan. Ha’u seidauk bele hateten serteza loloos maibé nia orsamentu totál mak $4.2 mill inklui kadeira tolu ne’e,” Sekretária Jerál Parlamentu Nasionál, Cedelizia Faria dos Santos, informa ba jornalista sira, iha Parlamentu Nasionál, segunda ne’e.
Entretantu, Sekretária Jerál PN ne’e fó-sai katak serimonia atu hatuur hikas meza prezidénsia ne’e data seidauk fiksa. Nia dehan, loloos ne’e atu hala’o serimonia rituál ba meza sira iha loron 30-agustu maibé loron 30 agustu monu iha loron domingu no haree mós deputadu sira sei iha hela resesu.
“Semana ida-ne’e nia laran, Prezidente Parlamentu ko’alia ona, sei iha reuniaun líder Bankada. Depois reuniaun líder bankada mak foin deside loloos data atu hatuur hikas meza ne’e realiza iha bainhira,” nia dehan.
Nia hatutan, durante ne’e Parlamentu Nasionál mós halo ona koordenasaun Sekretáriu Estadu Arte Kultura (SEAK) no Ministériu Administrasaun Estatál (MAE) ba prosesu serimónia kulturál nian
“Ami hala’o enkontru kuaze dala-tolu ona. Ha’u fiar katak sira mós halo ona koordenasaun ho munisípiu sira. Agora hein de’it data fiksa,” nia dehan.
Nia hateten, koordenasaun ho parte igreja mós momentu prezidente parlamentu nasional halo ona reuniaun ho Arkibispu Metropolitana Dili, Dom Virgílio do Carmo, tanba ne’e haree ba liña koordensaun ne’e la’o hela.
Nia hateten, kustu meza, kadeira Parlamentu Nasionál no serimónia ne’e tomak ninia estimasaun hamutuk orsamentu $25 mill, ne’ebé konsellu administrasaun aprova tiha ona inklui lori lia-na’in sira hosi munisípiu mai halo serimonia no resepsaun.
Notísia Relevante: Serimónia Hatuur-Hikas Meza PN Sei Realiza iha 30 Agostu
Jornalista : Evaristo Soares Martins
Editór : Cancio Ximenes
