DILI, 24 setembru 2020 (TATOLI)–Ministru Administrasaun Estatál (MAE), Miguel Pereira de Carvalho, hateten aloka osan purvolta rihun $200 ne’ebé hodi prodús farda ba xefe suku sira iha territóriu Timor Leste.
Notísia Relevante: Xefe Suku Munisípiu Baucau simu ona farda
“Produsaun farda ba xefe suku sira iha territóriu Timor Leste, ita aloka osan purvolta rihun $200,” dehan Ministru Miguel Pereira de Carvalho ba jornalista sira hafoin partisipa audiénsia públika ho komisaun A iha Parlamentu Nasionál, Dili, kinta ne’e.
Governante ne’e dehan, produsaun farda ba xefe suku sira tama ba konkursu públiku ne’ebé mak asina kontratu iha outubru 2019 no iha fulan juñu tinan 2020 mak tama iha MAE no iha setembru ne’e ami fahe tiha ona ba xefe suku sira.
“Entaun ami fahe iha fulan setembru tinan ne’e no ekipa MAE sei kontinua fahe tanba iha munisípiu balu seidauk fahe hotu, tanba planu distribusaun mak kleur uitoan tanba hahú iha munisípiu ida to’o suku hotu mak foin ba munisípiu seluk nune’e hein katak fulan outubru bele fahe hotu ona,” govenante ne’e haktuir.
Farda ba xefe suku sira hamutuk 450 iha munisípiu 12 inklui ho Rejiaun Adminsitrativu Espesiál Oé-Cusse Ambeno (RAEOA). Farda xefe suku sira-nian ne’e kompostu hosi faru rua (2), liman naruk ida ho liman badak ida, kalsa inklui ho sapatu.
Notísia Relevante: Semana oin, MAE sei distribui farda ba xefe suku sira
Jornalista: Osória Marques
Editór: Cancio Ximenes
