DILI, 07 outubru 2020 (TATOLI)-Sekretária Estadu Protesaun Sivíl (SEPS), ohin, realiza workshop nasionál ba redusaun risku dezastre iha setór Governu, ajénsia nasionál no internasionál no sosiedade sivíl hodi komemora loron mundiál redusaun risku dezastre ho tema ‘ Governansa ne’ebé di’ak ba redusaun risku dezastre’’.
Diretór Jerál SEPS, Superintendente Xefe Polísia, Ismael Babo, hateten, objetivu prinsipál hosi workshop ne’e hodi konvida parte Governu hosi liña ministeriál, ajénsia internasionál no nasional, sosiedade sivíl ho parte hotu, atu akumula matenek, opiniaun no sujestaun oinsá mak atu prepara kondisaun sira di’ak liután hodi responde dezastre kuandu akontese iha futuru.
Nia hateten Asembleia Jerál Organizasaun Nasoins Unida (ONU) iha loron 13 fulan outubru 1989, marka nu’udar loron mundiál redusaun risku dezastre, tanba ne’e Timor-Leste hanesan nasaun membru hola parte hodi komemora mós loron importante ne’e oinsá parte hotu atu haree hamutuk fila-fali intervensaun no kondisaun saida maka halo ona hodi responde ba siklu dezastre tuir padraun ONU nian.
“Ita prepara aan ba prevensaun bainhira seidauk iha dezastre hodi halo metigasaun, tanba dezastre ne’e forma hosi ita nia predisaun,” nia hateten.
Nia hatutan, intervensaun Governu no entidade sira nian durante ne’e asaun sira ne’ebé hala’o maka halo sosializasaun ba komunidade, alerta sistema teknolojia no atua dezastre liu-liu oinsá halo evakuasaun ba vítima umanu no sasán ho fó asisténsia emerjénsia no rekuperasaun.
Ismael Babo, agradese ba entidade hotu ne’ebé durante ne’e kolabora hodi servisu hamutuk ho SEPS hodi responde iha situasaun emerjénsia ba asisténsia umanitáriu, no buka atu hametin liu tan kooperasaun sira ne’e ba futuru hodi atua ba komunidade hotu ne’ebé afeta hosi dezastre naturaís.
Tuir relatóriu hosi sentru Jestaun Nasionál Dezastre SEPS kada tinan iha Timor-Leste ema besik na’in 10 mak lakon vida afeta hosi dezastre hanesan inundasaun mota lori, mout iha tasi, ai-tohar hanehan, rai halai hanehan no kona-ba estragu ba uma iha tipu tolu hanesan kaman, natoon no aat total dezde iha tinan 2019-2020 hamutuk 1,669.
Nia husu ba populasaun hotu atu kontinua kuidadu no halo prevensaun labele konstrui uma no hela besik iha mota ninin.
Jornalista : Nelson de Sousa
Editór : Francisco Simões
