BOBONARO, 16 outubru 2020 (TATOLI)—Iha ámbitu komemorasaun trajédia Balibo Five ba dala-45, Conselho de Imprensa (CI) atribui prémiu ba jornalista sira.
Rezultadu hatudu Jornalista Isaura Lemos de Deus hosi jornál diáriu Timor Post, sai vensendora ba prémiu Adelino Gomes, ho kategoria maiór traballu jornalístiku ho lian portugés.
Enkuantu, prémiu mellor órgaun no meiu komunikasaun sosiál relasaun ho jornalista, vensedor maka jornál diáriu Independente, no prémiu Maria Goretti kategoria jornalizmu pás no direitu umanu, manan-na’in maka Francisco José de Almeida hosi online organizasaun RENETIL, Neon Metin.
Reprezentante vensedora prémiu Adelino Gomes, Agustinho Alves dos Santos, orgullu tanba ninia parseiru bele sai manan-na’in.
“Ha’u nu’udár vensedora Isaura ninia kaben, sente kontente ba obra ne’ebé nia halo hodi ikus mai sai vensedora. Ne’e hanesan buat foun ne’ebé nia halo iha ninia knaar nu’udár jornalista iha jornál Timor Post,” Agustinho Alves dehan hafoin simu prémiu iha ámbitu komemorasaun trajédia Balibo Five iha postu administrativu Balibo, munisípiu Bobonaro, sesta ne’e.
Nia fó sasin katak durante ne’e vensedora iha vontade boot tebes maski hasoru difikuldade oioin maibé nafatin firme hodi hala’o knaar jornalistiku.
“Nu’udar kaben, ha’u prontu apoia nafatin iha vida jornalizmu hodi transmite informasaun ba públiku ho di’ak no kualidade,” nia kompromete.
Prezidente CI, Virgílio da Silva Guterres, hateten lansamentu ba prémiu ne’e realiza ona iha tinan 2017 ho prémiu hanesan Greg Shackleton, Adelino Gomes Borja da Costa, Bernadino Guterres no mosu tan prémiu ne’ebé rezultadu hosi kooperasaun Centro Nacional Chega (CNC) no CI, hanaran prémiu Maria Goretti.
Hanesan mós iha tinan 2018, bainhira prémiu hahú prosesa, CI halo avizu hodi mídia sira aplika hafoin forma panél juri atu fó kontribuisaun.
Vensedór hetan prémiu tinan kotuk no agora, mai hosi rezultadu avaliasaun panél juri na’in-hitu kompostu hosi asosisaun jornalista no akadémika hodi bele avalia hosi aspeitu hotu.
“Tinan ne’e ami la hetan vensedór ba prémiu Borja da Costa, Bernadino no Greg Shackleton. Ami hakarak hetan vensedór iha Balibo Five maibé la konsege tanba desizaun juri nian labele interven,” nia akresenta.
Objetivu atribuisaun prémiu, hakarak valoriza esforsu no obra jornalista, insentiva no motiva liután vontade hakerek tanba atribuisaun rekoñesimentu ne’e hanesan valorizasaun jornalista ne’ebé fakar-raan mate iha Timór tanba hala’o atividade profisionál.
Enkuantu prémiu Adelino Gomes ho objetivu promove no dezenvolve kualidade jornalizmu no promove mós lian portugés.
Manan-na’in sira hetan trofeu, sertifikadu no osan ho montante $1.500 ba kada prémiu, ne’ebé entrega rasik hosi Ministru Asuntu Parlamentár no Komunikasaun Sosiál, Francisco Jerónimo.
Jornalista: Antónia Gusmão
Editora: Julia Chatarina
