DILI, 21 outubru 2020 (TATOLI)–Liuhosi reuniaun Konsellu Ministru (KM), Governu aprova projetu dekretu lei, ne’ebé aprezenta hosi Ministru Petróleu no Minerál, Víctor da Conceição Soares, ba alterasaun dahuluk Orgánika Ministériu Petróleu no Minerál (MPM) nian.
“Ida-Ne’e hanesan proposta alterasaun tanba ministériu eziste hela no mudansa ne’e sei halo adaptasaun no atividade di’ak liután iha ministériu,” Ministru Prezidénsia Konsellu Ministru, Fidelis Manuel Leite Magalhães, hateten hafoin ramata reuniaun ezekutivu, kuarta ne’e.
Alterasaun ne’e introdús alargamentu kompozisaun konsellu konsultivu ministériu nian no transforma unidade aprovizionamentu sai diresaun ida.
Nune’e mós, gabinete jurídiku ministériu nian inklina iha diresaun jerál administrasaun bazeia ba dekretu lei ne’ebé mak agora vigora hela kona-ba organizasaun direta no inderete Estadu.
Enkuantu, projetu dekretu-lei ne’e kria mós Diresaun Nasionál Polítika, Planeamentu, Monitorizasaun no Avaliasaun.
Ho alterasaun ne’e, Prezidente Instituisaun autónoma ne’ebé tutela ba Ministériu Petróleu no Minerál hanesan Timor GAP, Autoridade Nasionál Petróleu no Minerál (ANPM) no Instituto Petróleu e Geolojia (IPG) integra ba Konsellu Konsultivu.
Jornalista: Antónia Gusmão
Editora: Julia Chatarina
