DILI, 06 novembru 2020 (TATOLI)—Estudante bolseiru no naun bolseiru Timoroan besik na’in 70-resin ne’ebé maka durante ne’e estuda iha nasaun Filipina iha sesta ne’e, fila ona mai Timor-Leste ho aviaun Cebu Pasific.
Sira to’o iha Aeroportu Internasionál Dili iha tuku 16:00 Otl; hamutuk ho pasajeru na’in ualu selu kompostu husi madre na’in rua, profesór Filipina na’in 5 no padre na’in ida.
Notísia Relevante :Estudante timoroan iha Filipina aluga rasik aviaun atu fila-mai Timor-Leste
Diretór Nasionál ba Assuntu Konsulár ba Komunidade Timoroan Ministériu Negósiu Estranjeiru no Kooperasaun, Herminio da Silva Pinto, hateten Nia informa, husi ema na’in 89, Timoroan hamutuk na`in 79, inklui sidadaun estranjeiru na’in 10.
“Ita-nia estudante sira ne’ebé agora to’o ona ho avião Cebu Pasific, hamutuk 89. Sira ne`e hanesan balun estuda hotu ona no balun seida’uk, tanba sira-nia pasaporte mate. No mós madre na’in rua, padre na’in ida ne’ebé halo missaun iha Timor no profesór husi Filipina na’in lima ne’ebé hanorin iha eskola internasionál iha Timor mak ohin to’o ona iha Timor-Leste,” nia inform aba Tatoli iha Aeroportu Comoro Dili, sesta ne’e.
Pasajeiru sira maka aluga rasik aviaun ne’e ho montante orsamentu hamutuk rihun 55 tanba kada billete sosa ho osan $750.
Hafoin to’o iha Aeroportu Internasionál Nicolau Lobato Dili, pasajeru hirak ne’e obrigatóriu kumpre kedas kuarentena iha Tasi-tolu no Tibar.
“Fatin hanesan ita-boot sira hatene, otél lubuk hira ne’ebé ita-nia Governu halo kontratu ho sira no fatin hirak ne’ebé ita-nia Govenu rasik estabelese hanesan Tibar no Tasi-Tolu, hanoin katak fatin mamuk barak atu akomoda sira. Ba Timoroan sira husi inísiu fulan-marsu to’o ohin loron, Governu mak sei responsabiliza durante loron 14 iha kuarentena, maibé ba estranjeiru sira rasik mak sei selu kuarentena durante loron 14 nia laran,” nia hatutan.
Notísia Relevante :PM Taur orienta lori fila estudante timoroan iha estranjeiru
Jornalista : Nelia Fernandes
Editór:Agapito dos Santos
