COVALIMA, 09 novembru 2020 (TATOLI)–Ministru Petróleu no Minerál, Víctor da Conceição Soares, ho komitiva hala’o vizita ba fatin fura mina-matan hanaran kumbili no Karau, ne’ebé lokaliza iha área Matai, postu administrativu Suai villa, munisípiu Covalima.
Hafoin observa direta posu rua-ne’e no rona esplikasaun husi reprezentante empreza Timor Resources, ne’ebé sei halo perfurasaun, Ministru Víctor da Conceição, hateten iha inísiu tinan oin sei hahú halo atividade petrolífera iha Suai.
“Lansamentu ofisiál depende ba tékniku empreza no bainhira preparadu ona bele realiza tuir kalendáriu husi Autoridade Nasionál Petróleu no Minerál (ANPM) katak iha trimestre dahuluk 2021,” Ministru hateten ba Agência TATOLI iha munisípiu Covalima, segunda ne’e.
Tuir membru ezekutivu ne’e, kondisaun iha fatin fura mina preparadu ona, tanba ne’e Governu sei bolu tékniku sira finaliza instalasaun.
“Governu tenke haree fó kontratu ba profisionál ne’ebé atu mai serbisu no tenke lalais, tuir planu prosesu ne’e iha dezembru 2020, tanba ne’e serbisu tenke hala’o ona,” nia informa.
Nia dehan, Governu laiha objesaun tanba hakarak kontribui no sempre disponível atu fó apoiu tomak, tanba hakarak aselera prosesu no otomista prosesu perfurasaun mina-matan foun ne’ebé identifika iha Covalima bele la’o ho di’ak.
“Teknikamente analiza dadus sira ne’ebé prátika indústria petróleu ninian sei halo tuir ho normál maibé iha posibilidade falla no tuir estimasaun Timor Resources katak iha optimizmu no haree ba espesialista halo analiza, iha esperiénsia barak iha indústria petrolífera,” nia hatutan.
Ministru Víctor da Conceição esplika, bazeia ba kontratu fahe produsaun ne’ebé uluk halo, parte Timor Gás no Petróleu, Empreza Públika (Timor GAP, EP) no Timor Resources partilla, tanba ne’e empreza iha obrigasaun atu kumpre iha faze dahuluk to’o atividade ramata.
Enkuantu, kontratu tuir mai sei realiza tan kontratu entre parte rua to’o perfurasaun faze dahuluk ramata.
Kontratu partilla produsaun iha bloku rua
Iha sorin seluk, Prezidente Konsellu Administrasaun ANPM, Florentino Mateus Soares Ferreira ne’ebé akompaña, reforsa katak vizita ne’e kobre iha munisípiu Covalima atu haree projetu sira iha setór petrolíferu, liuliu projetu Tasi Mane iha parte mina no gás atu haree planu perfurasaun iha futuru.
“Agora iha bloku kontratu partilla produsaun rua, ida iha munisípiu Covalima no seluk iha Manufahi. Bloku iha Covalima iha nível avansadu no la’o ona no ita hein de’it tinan oin bele realiza perfurasaun. Iha vizita ne’e haree ekipamentu lubuk ba perfurasaun ne’ebé preparadu ona,” nia informa.
Enkuantu bloku iha Manufahi, ativdade la’o no téniku hosi Timor Resources no Timor GAP halo estudu potensialidade mina iha área identifikadu rua.
Iha tinan 2015, liuhosi Konsellu Ministru hasai rezolusaun ne’ebé fó dalan ba Timor GAP hanesan empreza estatál ba mina, atubele buka parseiru, tanba ne’e iha tinan 2016 konsege lori Timor Resources hodi ko’alia ho Governu hanesan parseiru ba projetu petrolífera.
Parte rua hanesan parseiru fahe partisipasaun (asaun) 50% no husi parseria maka to’o ikus selebra kontratu produsaun hanaran Product Sharing Contract (PSC) lokaliza iha Covalima no Manufahi.
“PSC rua nia programa serbisu ba atividade esplorasaun maka iha 2017 hahú ho atividade leno rai-okos uza teknolojia ne’ebé iha no rekolla dadus iha rai-okos. Atividade ne’e hahú tinan 2017 to’o 2018, maibé balun to’o 2019 atu halo estudu iha munisípiu rua,” nia akresenta.
Dadus sira ne’e empreza rua aprezenta ba ANPM nu’udar autoridade reguladora ba atividade hotu liga ho asuntu petróleu no minerál iha Timór laran no sira hatama proposta mai posu poténsia atu sai posu halo perfurasaun iha fatin lima iha Covalima,” Florentino haktuir.
Husi fatin lima, ANPM deside fura mina-matan iha fatin tolu uluk maibé bainhira sujeita no deskobre buat ruma, maka sei fura mós posu rua tan, enkuantu autoridade nafatin kompaña atividade estudu ne’e.
“Agora hein tama faze perfurasaun, bainhira ita halo ona atividade maka tinan oin bele deskobre ezisténsia mina iha posu tolu. Tanba estudu bele iha no bele halo senáriu maibé bainhira ita fura mak bele hatene,” nia subliña.
Jornalista: Antónia Gusmão
Editora: Julia Chatarina
