DÍLI, 12 novembru 2020 (TATOLI)–Vigáriu Pároku Igreja Motael, Pe. Mariano Diaz, iha hateten Masakre 12 Novembru 1999 ne’ebé kunñesidu ho Masakre Santa Cruz nu’udar memória inesquecível (sei la haluha) iha istória Timor nian no ba nafatin.
“Ita halibur malu iha komemorasaun loron Nasionál Juventude Loriku Assu’ain nian ne’ebé ba dala-29, iha fatin lulik ida-ne’e atu “matar saudades” ka “lepas kangen” ho ita-nia matebian sira liuhosi orasaun no misa, ne’ebé hatudu liuhosi símbolu aifunan no lilin nu’udar sinal domin nian ne’ebe la nahas ba ita-nia matebian loriku assua’in ne’ebé mate fakar raan ba liberdade nasaun Timor-Leste nian,” dehan Padre Mariano Díaz, bainhira prezide misa ba selebrasaun Masakre Santa Cruz ba dala-XXIX no loron Nasionál Juventude ba dala-15 iha Igreja Motael, kinta ne’e.
Tamba ne’e, padre ne’e hateten, ema-nia “matar saudades” ka “lepas kangen” ne’e tama klean ita sentidu In Memoriam. Memoria luta ineskesível hosi juventude ba luta katak Libertar a Patria e Libertar o Povo.
Nia relembra, uluk juventude loriku assua’in sira luta hodi liberta patria, ohin loron timoroan hotu presiza servisu hamutuk tau kestaun bem-komum no justisa sosiál, lia-loos sai ema hotu nia interese atu liberta povu hosi ki’ak no mukit ba moris ne’ebé dignu liután no nakonu ho unidade no moris ksolok.
“Hanesan ita ema moris ne’ebé iha saudade ba malu atu hasoru malu, nune’e mos matebian juventude loriku assua’in sira ne’ebé mate ona, sira mós saudade hela hodi hein Maromak nia laran luak hosi ita hirak ne’ebé sei moris hela iha mundu ne’e,” nia dehan.
Nia hatutan, matebian juventude loriku assua’in sira-ne’ebé fakar raan ba mate ba rai Timor ida ne’e, hodi hetan Liberdade, ohin mós sira hein timoroan sira, hahú hosi ukun-na’in too iha povu kiik sira-nia mensajen tuir primeira leitura Livru Job nian ne’ebé dehan: “Ha’u hakarak hakerek ha’u-nia liafuan sira iha livru ida, hakerek nafatin iha fatuk ida atu labele lakon”.
Padre ne’e esplika liután, Kristu konvida sarani ida-idak iha selebrasaun loron juventude loriku assua’in ida-ne’e, hanesan timoroan hahú hosi ukun-na’in nasaun tantu sivil no militár, juventude sira hotu, povu kiik sira hotu imita ezemplu ukun Kristo nian ne’ebe ukun ho hahalok serbí la’ós hakmatek no tuur iha fatin ukun nian. Serbí la’ós tau interese privadu, grupu no partidu mak boot liu katak iha oin lori povu nia naran maibé iha kotuk lori ema ida nia naran no nia interese de’it.
Tamba ne’e, nia husu ba ema hotu-hotu atu imita hahalok di’ak juventude loriku assua’in ne’ebé uluk luta ba ukun rasik aan la sura sira-nia kolen maibé sura de’it loron bainhira loos mak Timor bele ukun aan.
“Imita sira hahalok luta no unidade, amizade no responsabilidade ne’ebé metin ba finalidade ida de’it mak liberdade no imita hahalok sira nu’udar sinál unidade, amizade no responsabilidade ne’ebé metin ba finalidade ida de’’it mak Ukun Rasik Aan,” nia hateten.
Padre ne’e husu ba governante sira tenke luta ba moris di’ak povu nian no kuidau aan hosi lasu dolar estranjeiru no ema laran, tanba iha tempu ohin loron ema laran aat sira ne’ebé mak hakarak sobu no fahe unidade timoroan hotu nian. Tamba ne’e, hahalok hirak ne’e mak sai nu’udar laran luak ne’ebé matebian juventude loriku assua’in hein hosi ema ida-idak hosi timoroan hotu ne’ebé moris no goja hela furak liberdade ukun rasik aan.
Iha missa ne’e partisipa husi Prezidende República, Primeiru-Ministru no membru Governu sira, deputadu sira iha Parlamento Nacional, Prezidente Tribunál Rekursu, insitituisaun estadu sivil no militár, komisaun organizadora 12 de novembru, padre no madre sira no juventude loriku aaswa’in, mate restu sira ho sarani sira hotu.
Hafoin misa remata, halo kedas marsa ka prosisaun ho rute hahú hosi Igreja Motael to’o simentériu Santa Cruz.
Jornalista: Domingos Piedade Freitas
Editór: Cancio Ximenes
