DILI, 13 novembru 2020 (TATOLI)—Ministériu Edukasaun Juventude no Desportu (MEJD) iha sesta (13/11) hahú distribui matéria ezame nasionál ba munisípiu 12 inklui Rejiaun Administrativa Espesiál Oe-Cusse Ambeno (RAEOA) hodi hala’o ezame nasionál ne’ebé tuir orariu sei monu iha loron 16 to’o 18 fulan-novembru.
Ministru Edukasaun Juventude no Desportu, Armindo Maia, informa totál estudante finalista hamutuk 55.072, kompostu husi ensinu báziku 30.359, ensinu sekundária jerál 20.145, kompostu husi siénsia teknolojia 10.365, siénsia sosiál no umanidade 9.780.
Notísia Relevante:MEJD kontrata Sylvia imprime matéria ezame nasionál
Enkuantu, estudante finalista husi ensinu sekundária tékniku vokasionál hamutuk 4.568, kompostu husi área tékniku 1.462, ekonomia komérsiu 1.501, otelária komérsiu 568, agrikultura no peska hamutuk 1.037.
Nia dehan estudante finalista 55.072 rejista maihusi eskola 444, eskola ensinu báziku 292, ensinu sekundária Jerál 96 no ensinu sekundáriu tékniku vokasionál 56.
Disiplina husi pontu ezame nasionál ba ensinu báziku terseiru siklu kompostu husi lian inglés, portugés, matemátika, siénsia fiziku naturál, istória no jeografia.
Ensinu Sekundária Jerál maka siénsia teknolojia, portugés, inglés, matemátika, fizika, biolojia, kimika, siénsia sosiál umanidades maka portuges, inglés, ekonomia, metodu kuantitativus, istória, jeografia no sosiolojia.
Husi ensinu sekundáriu tékniku vokasionál nian maka portugés, inglés, matemátika, fizika, kímika, ekonomia.
Eskola ekonomia no komérsiu nian mak português, inglés, matemátika, ekonomia métodus kuantitativu no ekonomia sosioloj.
Nune’e mós eskola otelaria no turizmu nian mak hanesan portugués, inglés, matemátika, ekonomia métodus kuantitativu, jeografia, sosialojia, kimika, ekonomia, istória, eskola agrikultura no peska maka portugués, inglés, matemátika no biolojia.
Ministru Edukasaun Juventude no Desportu, Armindo Maia maka ofisialmente entrega materia ezame nasionál hirak ne’e ba kada diretór servisu edukasaun munisípiu sira ne’ebé hetan akompañamentu husi Polisia Nasionál Timor-Leste.
Notísia Relevante:Sylvia sei finaliza prosesu impresaun matéria ezame nasionál iha novembru
Jornalista : Tomé Amado
Editór:Agapito dos Santos
