Xefe Estadu simu delegasaun Ministru Justisa CPLP
DILI, 26 Outubru 2026 (TATOLI) – Prezidente Repúblika, José Ramos-Horta, simu delegasaun husi Ministru Justisa husi Komunidade País Ko’alia Lia-Portugés (CPLP, sigla portugés), iha vizita kortejia hodi relata kona-ba Konferénsia Ministru Justisa CPLP ne’ebé hala’o husi loron 26 to’o 27 Outubru 2026, iha Dili.
Delegasaun ne’e kompostu husi Ministru Justisa Timor-Leste, Sérgio Hornai, Ministra Justisa Portugál, Rita Alarcão Júdice, no Ministra Justisa Saun Tomé no Prínsipe, Vera Maria Assunção Gomes Cravid.
Partisipante sira seluk mak reprezentante Ministériu Justisa Brazíl, Ricardo José, reprezentante Ministériu Justisa Angola, José Andrade, Ministériu Justisa Kabuverde, Filomena Amador, no Ministériu Justisa Mosambike, Stella da Graça.
Ministru Justisa, Sérgio Hornai, esplika katak vizita ne’e atu kumprimenta Xefe Estadu no informa kona-ba Konferénsia Ministru Justisa CPLP nian.
“Objetivu prinsipál husi konferénsia ida-ne’e atu kumpre ba iha estatutu ne’ebé define tiha. Hanesan Estadu-membru CPLP nian atu reúne tema estratéjiku sira ne’ebé importante ba iha kontinente CPLP ninian. Aleinde ne’e, haree kona-ba planu estratéjiku sira kona-ba oinsá mak bele konsolida Estadu direitu demokrátiku ida atu rezolve problema sira ne’ebé la’o iha komunidade”, Sérgio Hornai hatete.
Nia mós esplika katak tema sentrál ba konferénsia loron dahuluk nian mak kombate fraude online, jogu ilísitu no krime organizada ho ninia kompleksidade sira.
Governante ne’e hatutan katan konferénsia ne’e envolve reprezentante husi país membru CPLP, ne’ebé lori perspetiva rasik no esperiénsia atu konsolida instituisaun judisiária sira no dezenvolve medida prevensaun ba krime online, nune’e mós buka solusaun liuhusi koopersaun internasionál.
“Ida-ne’e atu fó solusaun ba iha problema sira ne’ebé mosu iha ita-nia kontinente no mós iha Europa, Áfrika, no Amérika”, nia dehan.
Notisía relevante: https://tatoli.tl/2026/10/25/timor-leste-organiza-konferensia-ministru-justisa-cplp-atu-kombate-krime-organizada/
Jornalista: Arminda Fonseca
Editora: Maria Auxiliadora
