AMD sei taka semitériu Bekusi iha Novembru tanba espasu nakonu ona
DILI, 26 Outubru 2026 (TATOLI)—Prezidente Autoridade Munisípiu Dili (AMD), Fransisco dos Santos, informa katak AMD sei taka Semitériu Bekusi iha fulan-Novembru 2026 tanba espasu atu hakoi mate-isin nian nakonu ona.
Tanba ne’e, família sira-ne’ebé sei hakarak hakoi mate-isin iha Dili presiza konsidera semitériu alternativa iha Metinaru, maski konstrusaun no fasilidade iha fatin referida seidauk kompletu.
“Ita hotu akompaña no haree katak Semitériu Bekusi besik nakonu ona. Ne’e signifika katak fatin atu hakoi mate-isin la to’o ona no tama ona iha faze finál. Tanba ne’e, parese iha fulan-Novembru nia laran ita sei taka semitériu ne’e, nune’e labele hakoi mate-isin tan iha-ne’ebá,” Prezidente AMD, Fransisco dos Santos, dehan ba jornalista sira iha Matadouru, Dili, Segunda ne’e.
Nia subliña katak fasilidade iha semitériu foun Metinaru seidauk kompletu hanesan moru protesaun no kapeliña.
“Tanba horisehik ami ba observa iha Semitériu Metinaru, konstrusaun seidauk kompletu, hanesan moru, ai-mahon no kapelina. Bainhira iha mate-isin atu hakoi, família tenke halo uluk misa, depoiz mak foin hakoi mate-isin,” Prezidente AMD relata.
Nia apela ba komunidade, liuliu família sira-ne’ebé hakarak hasai mate-isin husi rate iha Dili, atu halo tuir prosedimentu no husu autorizasaun hosi AMD antes lori mate-isin ba hakoi iha Semitériu Metinaru.
Rate sira-ne’ebé nia temi inklui Santa Krúz, Bidau Santana, Bekusi, Kaukalin no Rai-Kotu.
“Konstrusaun Semitériu Metinaru nian agora foin atinje 20%, no servisu ne’e foka ba preparasaun rai. Horisehik ami ko’alia ona ho kompañia atu aselera konstrusaun ne’e,” nia dehan.
Fransisco dos Santos esplika katak Semitériu Metinaru iha área ho luan ektare 10, besik Jardín Eroi Metinaru. Maski nune’e, fatin referidu seidauk iha ai-mahon no moru protesaun atu proteje rate hosi animál ne’ebé bele tama no estraga área semitériu nian.
Nia konsidera katak konstrusaun moru no preparasaun fasilidade bázika sira importante tebes atu garante seguransa, dignidade no kondisaun di’ak ba família sira-ne’ebé mai vizita no hakoi sira-nia membru família.
Kontestu
Asuntu kona-ba falta espasu iha Semitériu Bekusi no nesesidade atu transfere servisu hakoi mate-isin ba Metinaru la’ós foin mak mosu. Iha 03 Agostu 2022, Ministru Administrasaun Estatál (MAE), Miguel Pereira de Carvalho, informa katak Semitériu Bekusi sei nakonu iha fulan ida ka rua tuirmai, maski iha tempu ne’ebá sei iha espasu balun atu hakoi mate-isin.
Iha períodu hanesan, Governu mós diskute kona-ba konstrusaun no preparasaun semitériu foun iha Metinaru, inklui kapela no moru protesaun.
Lee notísia relevante: MAE: fulan ida-rua tan semitériu Becuse nakonu ona.
Iha 13 Juñu 2023, Prezidente AMD iha tempu ne’ebá, Guilhermina Filomena Saldanha, informa katak utilizasaun Semitériu Públiku Metinaru sei hein desizaun hosi Governu foun. AMD kontinua prepara fasilidade sira, inklui moru no krús boot, atu suporta utilizasaun semitériu ne’e.
Informasaun ne’e hatudu katak preparasaun atu uza Semitériu Metinaru presiza akompaña ho desizaun administrativa no fasilidade ne’ebé nesesária. Lee mós: Utilizasaun semitériu públiku Metinaro sei hein desizaun hosi Governu foun.
Jornalista: Osória Marques
Editór: Xisto Freitas da Piedade
