Utilizasaun semitériu públiku Metinaro sei hein desziaun hosi Governu foun
DILI, 13 juñu 2023 (TATOLI)–Prezidente Autoridade Munisípiu Dili (AMD), Guilhermina Filomena Saldanha, hateten utilizasaun semitériu públiku foun iha Metinaro sei hein Governu foun nia desizaun.
Notísia Relevante: Semitériu públiku Metinaro preparadu atu haloot mate–isin
“Kona-ba semitériu Metinaro ne’e sei hein hela Governu foun mai tanba ita hatene katak daudaun ne’e Governu ida-ne’e labele, maibé sira só kontrola de’it. Entaun, bainhira atu hala’o fali iha ne’ebá mak ha’u tenke informa lai ba Governu maibé ita hein lai tanba Governu atuál labele foti ona desizaun ba futuru semitériu públiku Metinaro,” Guilhermina Filomena Saldanha hateten ba Agência Tatoli iha nia servisu fatin Matadouro, tersa ne’e.
Maibé, nia dehan, AMD kontinua halo preparasaun ba semitériu foun mak halo lutu no prepara hela krús boot ida, tanba ema mate hakoi iha semitériu ne’e ema sarani katólika mak barak.
“Bainhira ita iha ona krús boot ida hodi tau iha semitériu foun Metinaro mak komunidade bele hahú haloot mate-isin iha ne’ebá. Maibé, ida-ne’e mós hein governu foun mai,” nia dehan.
Tanba, nia dehan, semitériu públiku iha Becusse ne’e mós daudaun sei iha espasu no sei bele akumula no hakoi mate-isin iha semitériu refere.
“Ita sei bele akumula ema mate tanba ita sei iha talião ida-ne’ebé uluk hodi uza ba sede relijiozu sira. Ita hotu hatene katak tuir loloos ita labele halo diskriminasaun no halo sede ba relijiaun ida. Entaun talião ida ne’ebá iha de’it kampa rua, nune’e ha’u oirienta tiha ona ita-nia komunidade atu okupa fatin mamuk ne’e. Maibé, depois Governu foun mai mak deside taka mak muda maibé bainhira seidauk, ita tenke utiliza fatin mamuk ne’ebé sei iha espasu,” nia dehan.
Nia hateten, rai ektare 35 hodi prepara ba haloot mate-isin no iha metru kuadradu 500 hanesan ne’e no planu hakoi ema kauze 700-800.
Semitériu Mpúbliku etinaro sei halo lutu, nune’e bele proteje no asegura hosi animál sira, tanba iha área ne’ebá ne’e animál husik la’o livre ne’e barak.
Notísia Relevante: Muda semitériu Becuse ba Metinaro sei hein desizaun hosi Governu
Jornalista : Osória Marques
Editór : Cancio Ximenes
