PNTL Bobonaru apela ba populasaun sira selebra finadu ho dame

BOBONARU, 26 Outubru 2026 (TATOLI) – Polísia Nasionál Timor-Leste (PNTL), Munisípiu Bobonaru, husu ba sidadaun hotu-hotu atu selebra loron finadu ho dame no intensaun di’ak, hodi kontribui ba manutensaun pás no estabilidade iha munisípiu.

Komandante PNTL Munisípiu Bobonaru, Superintendente Xefe Damião da Silva Correia, apela ba komunidade no joven sira atu komemora finadu ho responsabilidade, evita ódiu, vingansa no asaun violénsia ne’ebé bele hamosu konflitu entre grupu sira.

“Ita hotu-hotu mai ho intensaun komemora loron finadu kada tinan. Tuir tradisaun, ita sempre bá han hamutuk ho ita-nia matebian sira, mai ho konsentrasaun, idaidak ho nia responsabilidade. Se hemu lanu, iha ita-nia uma, labele bá halo fali asaun”, nia dehan ba

Atu garante seguransa durante komemorasaun ne’e, PNTL halo ona enkontru koordenasaun ho Kompañia Delta BOP Maliana no Forsa Defeza Timor-Leste (F-FDTL) destakadu iha postu Tunubibi hodi prepara planu operasionál ba loron finadu.

Komandante ne’e haktuir katak, iha tinan hirak liubá, akontese ona problema iha períodu loron Finadu. Tanba ne’e, PNTL halo prevensaun no aumenta vijilánsia iha fatin sira ne’ebé konsidera hanesan área risku ba konflitu.

“Kuandu orden planu operasaun finadu nia ne’e sai, komandu sei alerta la tolera joven sira ne’ebé halo krime. Ita hotu tenke hakribi, fó liman ba malu para garante seguransa no estabilidade ba ita-nia munisípiu”, nia dehan.

Komandante ne’e mós apela ba autoridade munisipál, autoridade lokál no komunidade atu sai matan no tilun ba situasaun seguransa iha sira-nia área, no informa lalais ba PNTL bainhira identifika problema ne’ebé bele ameasa pás no estabilidade.

Notísia relevante: Asalta malu iha Lourba, na’in-tolu kanek no ida transfere ba HNGV

PNTL Bobonaru sei hala’o patrullamentu no kontrolu ba sidadaun sira ne’ebé hemu tua iha dalan públiku.

“Patrulamentu hahú tuku 10 ba leten. Imi bele ezerse imi-nia liberdade, maibé labele hemu alkol iha luron, impede ema nia movimentu”, nia salienta.

Aleinde ne’e, PNTL mós sei hala’o operasaun pasa-revista hamutuk ho Diresaun Nasionál Tránzitu no Seguransa Rodoviária (DNTT) Munisípiu Bobonaru, ba karreta no motorizada, inklui verifikasaun dokumentu no ekipamentu obrigatóriu.

“Se la lori no laiha [dokumentu], normalmente ita sei prega multa ba nia. Selu tiha mak bele foti fali transporte”, nia dehan.

Komandu PNTL husu ba utilizadór estrada sira atu kumpre regra tránzitu, uza ekipamentu seguran­sa ne’ebé lei ezije no kondús veíkulu tuir limite velosidade iha área urbana no fatin seluk, hodi hamenus risku asidente rodoviária.

PNTL mós sei hala’o operasaun kontrolu ba arma branka tuir lei ne’ebé regula autorizasaun atu lori arma sira-ne’e. Atu prevene konflitu, PNTL identifika ona fatin sira ne’ebé iha risku aas, bazeia ba kazu sira ne’ebé akontese iha tinan rua liubá.

“Forsa polísia sei destaka membru sira atu hala’o seguransa permanente iha fatin hirak ne’e, no kontinua patrullamentu regulár iha suku sira, inklui kolokasaun membru polísia iha sentru komemorasaun no semitériu sira”, nia realsa.

PNTL hein katak liuhusi kooperasaun entre autoridade, forsa seguransa no komunidade, komemorasaun loron finadu iha Bobonaru bele hala’o ho dame, orden no responsabilidade.

Notísia relevante: Tribunál aplika prizaun preventiva ba arguidu DS-HN-CP envolve kazu Lourba

Jornalista: Sergio da Cruz

Editora: Maria Auxiliadora