BOBONARO, 03 novembru 2023 (TATOLI)- Kazu asalta malu ne’ebé akontese iha suku Loruba, postu administrativu Bobonaro, munisípiu Bobonaro, sesta ne’e rezulta joven na’in-tolu kanek núne’e obrigatoriu tenke evakua kedas ba Hospital Referál Maliana hodi halo tratamentu intensivu no na’in-ida tenke evakua ba Hospital Nasionál Guido Valadares (HNGV), Dili.
Joven na’in-tolu ne’e na’in-rua kanek tanba rezulta hosi bala-musan ne’ebé tiru hodi autoridade seguransa hodi halo atuasaun ba konfrontu refere.
Notísia Relevante:Asalta malu iha Lourba, komunidade nia uma hetan sunu
“Pasiente na’in-tolu ne’e kanek refere hosi Bobonaro, ida naran J kanek hosi tilun rezulta hosi bala-musan, ida fali naran JN ne’e mós kanek tanba rezulta hosi tiru bala-musan entaun halo nia ruin tohar, ida fali ne’e laiha kanek ne’ebé maka’as, nia kanek iha parte ulun,” Médiku hosi Hospital Referál Maliana, Armenio Goncalves, informa ba Jornalista sira, iha sala emerjénsia, Maliana.
Hafoin halo tratamentu, médiku sira deside transfere urjénsia JM, ba Hospital Nasionál Guido Valadares, tanba pasiente raan barak mak sai.
“Ninia atestadu jerál di’ak hela, só ké ita preokupa tanba nia iha pendarahaan ativu hela hosi nia inus. Ne’e ita deskonfia kanek ne’ebé mak rezulta hosi bala-musan tama hosi tilun, entaun halo pasiente kanek, tanba ne’e mak halo raan ne’e sulin nafatin hosi inus, ami halo ona tratamentu ho ai-moruk balu, maibé raan kontinua sai, ami husu família atu halo doasaun raan, sira dehan agora daudaun falin laiha, entaun tenke hodi ba Dili, halo operasaun hodi hapara nia raan ativu ne’e,” Médiku ne’e esplika.
Tuir planu, pasiente rua seluk sei transfere hotu ba Dili, maibé la ho karáter urjénsiarjensia.
Notísia relevante: Joven ida hetan taa hosi ema deskoñesidu iha Lourbaeees
Jornalista: Sérgio da Cruz
Editór: Evaristo Soares Martins
