DILI, 16 novembru 2020 (TATOLI)—Ministru Edukasaun Juventude no Desportu (MEJD), Armindo Maia, enkoraja no husu ba estudante ensinu báziku terseiru síklu no ensinu sekundáriu jerál désimu segundu inklui tékniku vokasionál sira iha territóriu Timor-Leste atu hakas-an durante prosesu ezame nasionál nune’e bele hetan valór di’ak.
Nia hato’o asuntu ne’e bainhira halo abertura ba ezame nasionál ne’ebé hala’o iha eskola ensinu sekundáriu Sagradu Coracão de Jesus (SACROJES) Becora, segunda (16/11).
Notísia Relevante:Governu sei halo abertura ba ezame nasionál iha Dili no Ermera
Iha 2020, MEJD eskolla eskola SACROJES Becora Dili, no Eskola Sekundáriu Jerál Nino Conis Santana Gleno Ermera reprezentan eskola hotu iha territóriu hodi halo abertura ba ezame nasionál.
Governante apela ba estudante 300-resin atu hakas-an hodi hetan rezultadu di’ak para garante futuru ne’ebé maka di’ak mós.
“Ha’u fiar estudante ne’ebé matenek mak estudante ne’ebé sempre prepara ninia an. Tanba ne’e ha’u husu ba oan sira iha eskola ne’e atu hakas-an ba atu hetan rezultadu ne’ebé diak. Oituan ka barak ida ne’e mak sei garante imi nia futuru,” Armindo hateten ba jornalista sira.
Alende ne’e, MEJD mós fó hanoin ba estudante sira katak, hanesan sarani ne’ebé di’ak labele haluha Maromak liuhusi orasaun husu Maromak Ninia bensaun no grasa atu proseu ezame nasionál ne’e bele la’o ho di’ak.
Serimónia abertura ne’e hahú iha tuku 08:00 dader, MEJD akompañadu husi xefe gabineti, diretór servisu edukasaun munisipál Dili, inklui diretór, adjuntu no profesór sira husi SACROJES.
Serimónia ne’e ofisializa ho atrasaun drum band husi estudante SACROJES.
Notísia Relevante:MEJD hahú distribui materia ezame nasionál
Jornalista:Tomé Amado
Editór: Agapito dos Santos
