DILI, 17 novembru 2020 (TATOLI)--Primeriu Ministru, Taur Matan Ruak, konfirma ona Rui Gomes atu subtitui Fernando Hanjam asume kargu Ministru Finansa iha VIII Governu Konstitusionál.
“Sim, ha’u konfirma no ha’u ko’alia ona ho Prezidente Repúblika, ami marka loron ba segunda, semana oin Prezidente Repúblika fó tomada pose ba nia (Rui Gomes) hodi subtitui Fernando Hanjam,” PM Taur hateten hafoin sorumutuk ho Xefe Estadu iha Pálasiu Prezidensiál, Bairro Pité, tersa ne’e.
Fernando Hanjam nia kondisaun saúde la primite atu kontinua kargu ezekutivu ne’e, tanba nia presiza deskansa.
Rui Gomes hanesan ekonomista ne’ebé lidera ona ekipa Programa Rekuperasuan Ekonómika ba mandatu loron-100.
Aleinde ne’e, nia mós nu’udar Ministru Finansa iha VII Governu Konstitusionál no atualmente hanesan asesór iha Presidénsia Repúblika,
Fernando Hanjam simu pose iha loron 24 juñu 2020 hosi Prezidente Repúblika, Francisco Guterres ‘Lú Olo’, ne’ebé kumpre ona resposabilidade hodi halo preparasaun no diskusaun proposta OJE 2020 no 2021 hamutuk ho Vise-Ministra, Sara Lobo Brites.
Jornalista: Florêncio Miranda Ximenes
Editora: Julia Chatarina
