ERMERA, 18 novembru 2020 (TATOLI)–Prezidente Repúblika, Francisco Guterres Lú Olo, husu ba joven no estudante sira tenke ezerse sira-nia matenek hodi lori nasaun Timor-Leste ne’e ba oin.
Notísia Relevante: Timor-Leste tenke iha kualidade edukasaun
“Juventude no estudante sira tenke ezerse imi-nia matenek ho di’ak. Ami hakarak husik hela ba ita-nia rai ida-ne’e, futuru mak imi joven no estudante duni. Liuhosi edukasaun ida-ne’ebé di’ak para oan sira bele sai matenek no sai matenek para lori ita-nia rai ida-ne’e kontinua ba oin nafatin. Atu hatudu nafatin ba mundu katak ita Timor-Leste nasaun ida livre, independente, no nasaun ne’ebe ita harii husi ita nia bei’ala sira-nia raan no isin atu lao ba oin,” Prezidente Repúblika Francisco Guterres Lú Olo hatete iha nia diskursu hafoin halo vizita dala ikus iha Eskola Sekundáriu Jerál (Esg-sigla portugés) Hélio Sanches Pina Mau-Kruma iha Munisípiu Ermera, kuarta ne’e.
PR Lú Olo haktuir joven no estudante sira mak futuru ba rai no nasaun ida-ne’e nian la’ós jerasaun tuan sira. Buat ne’ebé sira halo ona to’o nia tempu no tempu seluk joven no foinsa’e sira mak hatutan.
Lú Olo hatutan, PR hamutuk ho Ministru Edukasaun Armindo Maia hodi sai testamuna katak sabraka ne’ebé PR kuda sei fo fuan ba oan ne’ebé mak eskola iha eskola refere.
“Ha’u hakarak hateten katak eskola ne’e tama ona ba responsablidade Ministériu Edukasaun Juventude no Desportu (MEJD) nian no estudante hira ona mak sai finalista no balun sai ona ba rai liur no ba to’o iha rai Filipina. Ha’u rona no balun iha universidade maibé sira mós iha aproveita iha universidade signifika eskola ida-ne’e mós hatudu nia kualidade ida-ne’ebé bele sai di’ak ba ita-nia oan sira,” PR Lú Olo hateten.
Iha vizita ne’e, PR Lú Olo hatete, nia ho ME mós haree ona kondisaun eskola refere no VIII Governu ne’ebé mak lidera hosi Primeiru-Ministru, Taur Matan Ruak, sei tau atensaun maka’as no boot liu ba edukasaun, saúde no agrikultura no assuntu ne’ebé mak liga direita ho povu nia moris no aposta liu iha kualidade edukasaun ne’ebé aas no matenek liután.
Biban ne’e, Prezidente Lú Olo husik hela mensajén apresiasaun ba profesora no professór sira ne’ebé ho kbiit uitoan maibé ho vontade ne’ebé mak boot hodi harii eskola ne’e hahú hosi kiik to’o ohin loron.
Aleinde ida-ne’e, Xefe Estadu hateten, haksolok tebes ho ESG naran Hélio Sanches Pina Mau-Kruma iha Munisípiu Ermera.
“Prezidente Repúblika haksolok tebes hodi vizita no hasoru malu ho estudante no professór sira iha eskola ida naran ESG Hélio Sanches Pina Mau-Kruma no ha’u haksolok ho estudante ho professór no partikularmente ha’u haksolok mós ho eskola ne’e nia naran,” PR Lú OLo hateten.
Naran Mau-Kruma ne’e, nia dehan, sidadaun timoroan ida ne’ebé halo funu ho Prezidente sira iha tempu ai-laran no mate mós iha ai-laran.
“Helio Sanches Pina ‘Mau-Kruma” uluk ne’e Ministru iha primeiru Governu Konstitusionál nian hanesan Ministru Agrikultura. Se la sala, ha’u sei lembra hela ne’e. Nia ami-nia amigu boot. Tanba ne’e mak ha’u hanoin Eskola ne’e hola naran ne’e atu bele fó kbiit liután ba profesór no profesora sira, ba alunu no aluna sira liuliu ba imi-nia inan-aman sira atu bele prejerva nafatin eskola ida-ne’e, atu bele fó isin ba oan sira no bei’oan sira ne’ebé hola fatin iha eskola ida-ne’e atu nune’e sai aliserse loloos ba Estadu Direitu Demokratiku ne’ebé ita harii tiha ona,” nia dehan.
Jornalista: Osória Marques
Editór: Cancio Ximenes
