DILI, 23 novembru 2020 (TATOLI)–Primeiru Ministru (PM), Taur Matan Ruak kongratula prontidaun Rui Gomes asume kargu Ministru Finansa hodi subtitui Fernando Hanjam iha VIII Governu Konstitusionál.
“Ha’u kongratula no deseja susesu iha ita-boot nia mandatu, hakarak agradese mós ba Vise-Ministra Finansa, Sara Lobo Brites, ne’ebé durante ne’e asume knaar no kontinua serbisu hamutuk ho Ministru Rui Gomes, ne’ebé iha koñesimentu kle’an kona-ba funsionamentu jestaun finansa no públika ho di’ak, inklui dezenvolvimentu ekonomia no mellora kreximentu ekonómiku,” PM Taur hateten iha diskursu ámbitu pose ba Ministru finansa foun, iha Palásiu Prezidensiál, segunda ne’e.
Xefe Governu rekoñese, ministru emposadu iha esperiénsia barak no dezempeñu di’ak iha funsaun públika no ezekutiva, tanba ne’e merese atu lidera Ministériu Finansa (MF) to’o mandatu Governu atuál ramata.
Ministru sesante, Fernando Hanjam la konsege kontinua ninia mandatu tanba kondisaun saúde la permite, ne’ebé iha loron 05 novembru hato’o ninia karta demisaun ba atu demite husi kargu tanba kestaun saúde.
Notísia Relevante: Xefe Estadu konfia Rui Gomes hadi’ak dezempeñu finanseiru no ekonómiku
Biban ne’e, PM Taur agradese ba Sekretáriu Jerál Partidu FRETILIN, Marí Alkatiri no Konselleru Másimu Partidu KHUNTO, José dos Santos Naimori Bucar, tanba ho komunikasaun di’ak bele hili Rui Gomes asume kargu Ministru Finansa hodi garante estabilidade no normalidade iha VIII Governu Konstitusionál.
“Publikamente ha’u hato’o gratidaun ba Fernando Hanjam no espera bele rekupera lalais, tanba iha situasaun defísil no ezijente tebes bele hamutuk ona ho ami prepara Orsamentu Jerál Estadu 2020 no 2021 inklui programa Governu ho resposabilidade,” nia agradese.
Xefe Governu espera ho subtituisaun ne’e, líder departamentu governamentál ne’ebé responsável atu koordena ezekusaun orsamentál bele iha esperiénsia governativa no koñesimentu kle’an iha administrasaun finanseira Estadu, no mós hatene no kompriende nesesidade fundamentál ezekusaun medida ne’ebé prevee ona iha dokumentu.
“Ita bele alkansa susesu ne’ebé ita hakarak ba kreximentu ekonómiku no koezaun sosiál ho artikulasaun di’ak, ho lideransa partidu ne’ebé mak apoia Governu iha Parlamentu Nasionál, tanba ne’e ha’u konvida Rui Gomes atu dezempeña funsaun Ministru Finansa no nia hatan ba konvite ne’e, maski nia hatene katak iha dezafíu,” nia katak.
Rui Gomes iha esperiénsia akadémika no profisionál iha domíniu ekonómiku, orsamentál no finanseiru, promosaun ba kreximentu ekonómiku no sosiál ne’ebé sustentável, apoio ba mudansa estruturál no defeza ba distribuisaun rendimentu justa no ekuitativa.
“Ha’u aproveita biban ida-ne’e atu hato’o satisfasaun no haksolok kle’an, tanba bele konta ho Doutór Rui Gomes iha ha’u-nia Governu. Ha’u dezeja saúde di’ak no susesu ba mandatu ne’ebé hahú agora,” Xefe Governu tenik.
Iha biban ne’e, Ministru Finansa emposadu, Rui Gomes, apresia no iha ninia mandatu sei prioritiza jestaun finansa públika hodi garante estabilidade ekonomia no sosiál.
“Ha’u sei kontinua prioridade VIII Governu atu profunda liután hadi’a jestaun finaseira liuhosi diversifikasaun finanseiru, haree husi parte despeza no reseita, hadi’a aprovizionamentu inklui fortalese sistema sentralizasaun finanseira,” nia afirma.
Jornalista: Florêncio Miranda Ximenes
Editora: Julia Chatarina
