DILI, 24 novembru 2020 (TATOLI)—Ministru Administrasaun Estatál (MAE), Miguel Pereira de Carvalho, konvida Prezidente Parlamentu Nasionál, Deputadu Aniceto Longuinhos Guterres Lopes, atu prezide serimónia hatún bandeira iha komemorasaun loron proklamasaun 28 novembru ba dala-45 ne’ebé realiza iha Munisípiu Liquiça.
“Ha’u mai husu ba Prezidente Parlamentu Nasionál atu prezide serimónia hatún Bandeira Nasionál iha 28 novembru 2020 nian,” Ministru Administrasaun Estatál, Miguel Pereira de Carvalho, informa ba jornalista sira iha resintu Parlamentu Nasionál, tersa ne’e.
Miguel Pereira de Carvalho informa, serimónia hatún Bandeira Nasionál ne’e sei hala’o iha área Plila, Aldeia Raukasa, Suku Lauhata, Postu Administrativu Bazartete.
Ministru Administrasaun Estatal ne’e fó-sai katak, koordenasaun servisu entre komisaun organizadora nasionál no munisipál la’o di’ak tebes.
“Kooperasaun ho autoridade Munisípiu Liquiçá la’o ho di’ak tebes hodi mobiliza populasaun sira. Tanba ne’e mak sira mós fó apoia ba sesaun feira, preparasaun fatin, preparasaun eletrisidade, ateru fatin sira iha-ne’ebá. Populasaun sira sente kontente tebes ho selebrasaun ida-ne’e. Sira sente katak serimónia 28 novembru tinan ida-ne’e hala’o duni iha Munisípiu Liquiçá,” nia dehan.
Jornalista: Evaristo Soares Martins
Editór: Cancio Ximenes
