DILI, 26 novembru 2020 (TATOLI) – Embaixadór Austrália iha Timor-Leste (TL), Peter Roberts, hamutuk ho nia kaben no oan mane na’in-rua no família embaixada Austrália nian, ohin, oferese prezente Natál ba labarik-sira iha fundasaun Sentru Quesadhip Ruak (CQR, sigla portugés) iha Taibesi, Dili.
Notísia Relevante : Embaixadór Peter Roberts kompromete hametin relasaun TL-Austrália
Peter Roberts hateten, doasaun ne’e hala’o kada tinan hodi fó apoiu ba atividade fundasaun CQR nian atu selebra festa boot Kristaun nian mak Natál hamutuk ho labarik-sira iha Dili no mós iha munisípiu-sira.
“Sasán hirak ne’e ha’u ho ha’u nia kaben, ha’u nia oan na’in-rua no komunidade embaixada nian mak fó ba labarik-sira iha Timor, liu-liu iha fundasaun ne’e, hodi selebra loron Natál ne’ebé sei mai,” Peter Roberts hateten.
Peter Roberts mós hamutuk ho nia kaben no oan na’in-rua espresa sira-nia sentimentu ksolok tanba bele serbisu hamutuk ho fundasaun ne’ebé halibur labarik-sira liuliu fundasaun Sentru Quesadhip Ruak.
Tuir planu, iha loron 11 dezembru, Embaixadór Peter Roberts ho família sei selebra Natál hamutuk ho labarik-sira iha fundasaun ne’e.
Iha fatin hanesan, fundadora fundasaun Centro Quesadhip Ruak, Isabel Ferreira, agradese ba Embaixada Austrália iha Timor- Leste ho família ne’ebé oferese ona doasaun “sasán halimar” ba labarik-sira ne’ebé hala’o atividade iha fundasaun ne’e.
“Semana oin, ita tama ona ba tempu Adventu no lakleur tan ita atu selebra Natál. Embaixadór ho nia família hakarak partilla jestu domin no amizade ho labarik-sira iha Timor-Leste, liu-liu iha fundasaun ne’e. Ha’u hodi Timoroan hotu nia naran agradese ba Embaixadór Peter Roberts ho nia espoza Lisa Roberts ne’ebé apoiu ona sasán hirak ne’e,” Isabel espresa sentidu gratidaun.
Fundadora CQR ne’e mós promete katak, sei hasa’e nafatin orasaun ba Nai Maromak atu haraik bensaun no isin di’ak nafatin ba embaixadór ho família iha atividade hotu.
Isabel relata, sasán halimar ne’ebé embaixadór ho nia família oferese mak hanesan boneka, viola ki’ik ba labarik-sira no sasán seluk tan.
Nia mós informa katak, durante ne’e embaixadór ho família rasik apoia ona biblioteka ba labarik-sira iha CQR Taibesi no embaixadór nia espoza rasik hanorin ki’ik-oan sira lian Inglés.
Oras ne’e daudaun fundasaun CQR halibur labarik hamutuk 80 resin ne’ebé sentraliza iha fatin-rua mak hanesan Colmera no Taibesi.
Atividade loroloron ne’ebé labarik-sira hala’o iha fundasaun CQR maka, aprende lian Inglés, Portugés, lian Koreia no seluk tan.
Jornalista : Hortencio Sanchez
Editór : Francisco Simões
