LIQUIÇÁ, 27 novembru 2020 (TATOLI)—Iha ámbitu feira nasionál iha suku Lauhata, komemora loron Proklamasaun Independénsia ba dala-45, Restaurante Jireh Lila, Unipessoal LDA sai vensedór ba kategoria komérsiu.
Iha entrevista, na’in ba Retaurante, Lila Ribeiro Dias Ximenes, haksolok tanba bele sai vensedór ba eventu nasionál ne’e.
“Ha’u sente kontente, la espera ohin loron Jiren Lila bele sai vensedór iha feira ne’e,” nia dehan ba Agência TATOLI, iha seremónia enserramentu feira nasionál, iha Lauhata, sesta ne’e.
Restaurante ne’e sai vensedór hafoin hafoin ekipa juri avalia iha stand ne’ebé sira prepara iha feira ne’e.
Tuir ekipa juri, restaurante vensedór aprezenta kuaze produtu lokál, hahú husi etu ne’ebé uza foos rai, modo no bebida hotu, inklui atendimentu di’ak tebes ba kliente sira.
Notísia Relevante: Negosiante feira nasionál Lauhata kontente tanba hetan rendimentu di’ak
Ekipa ne’ebé halo avaliasaun kompostu hosi Organizasaun Naun Governamentál (ONG) Haburas no Dosente hosi Dili Institute of Technology (DIT), departementu Otelaria.
Tuir Lila Ribeiro, restaurante iha maneira atendimentu rasik, atu ema hotu bele sente di’ak.
“Ami oferese hahan tradisionál hanesan manu lalar Timór, salada, raba-raba, etu uza foos rai, katupa no seluk tan,” nia karesenta.
Negosiante ne’e fó sasin, bainhira partisipa eventu ne’e hetan rendimentu di’ak, kompara ho tempu bain-bain.
“Meudia to’o kalan ha’u hetan $200 to’o $280, maibé antes ne’e ha’u halo de’it katering no rendimentu la hanesan feira ne’e,” nia informa.
Maski feira ne’e iha tempu badak, maibé na’in ba restaurante sente kontente tanba hetan oportunidade di’ak.
“Ha’u kongratula Governu bele realiza feira ne’e, husu Ministériu Turizmu, Komérsiu no Indústria (MTKI) kuandu realiza eventu hanesan ne’e, tenke prepara fasilidade tanba feira daudaun ne’e laiha bee, ami lori bee hosi Dili no dala ruma bá fali Liquiçá foti bee,” nia dehan.
Jiren Lila hanesan vensedór hetan ho taxa permante ida no taxa rotativa inklui osan ho montante $300.
ba segundo lugar kategoria komérsiu maka Feto Behata Atauro no terceiro lugar maka grupu Moris Hakmatek Maubara.
Enkuantu, ministériu ne’ebé okupa primeiro lugar, kategoria ministériu ba eventu feioa nasionál ne’e maka MTKI, segundo lugar okupa husi Ministériu Petróleu no Minerál (MPM) no terseiro lugar okupa hosi Ministériu Obra Públika (MOP)
Alein de ne’e, hanesan ministériu organizadór eventu, Ministériu Administrasaun Estatál (MAE) no MTKI atribui sertifikadu ba patrosinadór eventu feira ne’e rasik hanesan, Mahoka no empreza turizmu rasik.
Feira nasionál ne’e realiza hahú iha loron 22 to’o 27 novembru, iha suku Lauhata, postu administrativu Bazartete, munisípiu Liquiçá.
Eventu ne’e realiza hosi Ministériu MTKI no MAE, ho kolaborasaun hosi parte autoridade lokál, ho orsamentu $44.000 resin no envolve grupu empreza kiik hamutuk 74 no instituisaun Estadu 23.
Jornalista: Natalino Costa
Editora: Julia Chatarina
