DILI, 22 janeiru 2021 (TATOLI)-–Governu liuhosi Ministru Koordenadór Asuntu Ekonómiku (MKAE), Joaquim Amaral, hateten proposta akordu investimentu espesiál ho empreza Pelican Paradise kuaze konklui, tanba ne’e iha tempu besik sei lori ba Konsellu Ministru hodi hetan apresiasaun.
“Preparasaun proposta akordu investimentu espesiál iha ona faze finalizasaun atu lori ba Konsellu Ministru atu hetan aprovasaun. Ami halo koordenasaun di’ak tebes ho Pelican Paradise atu oinsá fasilita investimentu ne’e ba oin,” Ministru Joaquim Amaral, hateten hafoin partisipa iha retiru VIII Governu Konstitusionál, iha edifísiu Ministériu Finansa, Aitarak-laran, sesta ne’e.
Notísia relevante: Pelican Paradise Kontinua Obra Faze Dahuluk Konstrui Otél Durante Estadu Emerjénsia
Tuir proposta investimentu ne’e katak Governu Timor-Leste mak sai responsável atu rezolve okupante sira ne’ebé iha rai-mamuk ka livre ona, hafoin empreza Malázia ne’e bele hahú obra.
Daudaun ne’e, Governu esforsu hela atu rezolve kestaun balun ho populasaun ne’ebé maka hela iha área besik projetu Pelican Paradise atu kontinua ba faze tuir mai.
Tuir governante ne’e, VIII Governu kontinua de’it akordu investimentu espesiál ne’ebé Governu anteriór hala’o ona hodi fasilita empreza estranjeiru ne’e.
“Investimentu ne’ebé lori tempu naruk no iha komplesidade, presiza duni atu rezolve. Maibé ita-nia alvu lalais di’ak liután, nune’e ezekutivu sira bele aprova hodi sertifika Pelican Paradise implementa projetu dezenvolvimentu turíztiku iha área entre Tasi-tolu no Tibar,” governante ne’e akresenta.
Iha sorin seluk, Diretór Ezekutivu Pelican Paradise, Jeremiah Chan, husu ba Governu liuhosi MKAE atu aselera akordu investimentu espesiál ne’e hodi fasilita projetu dezenvolvimentu turíztiku.
“Ami hein hela akordu investimentu espesiál, tanba se karik laiha akordu investimentu atu kesi metin entaun investimentu boot ne’e labele la’o ho di’ak tanba laiha fiar hosi Governu hodi asegura ba rai no seluk tan,” Resposavél ne’e afirma iha ninia knaar fatin, Timor Plaza.
Nia konsidera ho akordu investimentu espesiál bele regula no fó klaru saida mak sai resposabilidade empreza no resposabilidade Governu.
Nune’e, Dirijente empreza ne’e iha esperansa katak proposta akordu investimentu espesiál ne’e bele konklui ona.
“Ami la presiza osan hosi Governu atu aumenta ba investimentu ne’e, maibé tenke halo akordu atu fasilita ami,” nia subliña.
Empreza Pelican Paradise presiza halais akordu investimentu espesial atubele fasilita hodi halo kontratu ho kompañia seluk hodi hamutuk halo investimentu faze dahuluk ba konstrusaun otél, apartamentu no rezidénsia hamutuk unidade 287 ho estandarte fitun-lima, ho kustu orsamentu millaun $100 iha.
“Ami-nia kompromisu boot tebes atu halo investimentu. Tanba ne’e ami hahu ona projetu investimentu ba faze dahuluk ne’e,” nia akresenta.
Tuir planu, Pelican Paradise sei halo dezenvolvimentu turíztiku ho investimentu hamutuk miliaun $700.
Área dezenvolvimentu turíztiku ne’e tuir planu sei harii iha rai ektare 558, iha zona entre Tasi Tolu no Tibar, ne’ebé sei inklui unidade otelaria, kampu golf, lote rezidensiál, sentru dezenvolvimentu ba joven sira, eskola internasionál ida, ospitál ida no sentru komersiál.
Dezenvolvimentu ne’e sei permite kriasaun kampu traballu ba ema 1.500 iha faze konstrusaun no 1.300 kampu traballu permanente hafoin konstrusaun no reflorestasaun projetu.
Jornalista: Florêncio Miranda Ximenes
Editora: Julia Chatarina
