DILI, 25 janeiru 2021 (TATOLI)–Pelican Paradise loke ona konkursu públiku ba investimentu faze dahuluk konstrusaun otél, apartamentu no rezidénsia hamutuk unidade 287 ho kustu orsamentu millaun $100.
“Ami halo ona prosesu konkursu públiku atu komesa halo ona konstrusaun ba investimentu faze dahuluk iha área entre Tasi-tolu no Tibar,” Diretór Ezekutivu Pelican Paradise, Jeremiah Chan, informa ba Agência TATOLI foin lalais ne’e, iha ninia knaar fatin, Timor Plaza, sesta ne’e.
Iha faze dahuluk, empreza Malázia ne’e sei hahú projetu iha rai ektare 16, ne’ebé tuir planu sei finaliza iha tinan 2024.
Pelican Paradise haree iha área dezenvolvimentu propriedade hodi halo dezeñu no kalkulasaun kustu, enkuantu ba implementasaun loke konkursu públiku.
Tanba ne’e, finaliza ona konkursu públiku iha loron 05 janeiru foin lalais no hetan oan empreza ne’ebé konkorre ba investimentu.
“Daudaun ne’e ami finaliza kontratu ho empreza kontratór sira atu implementa ona konstrusaun ne’e, maibé antes atu fó asina kontratu ho empreza sira, ami presiza aprovasaun akordu investimentu espesiál hosi Governu Timor-Leste,” Resposável ne’e akresenta.
Notísia relevante: MKAE sei submete proposta akordu investimentu Pelican Paradise ba KM
Projetu Pelican Paradise, sei dezenvolve área ospitalidade, turizmu no seluk tan atu atrai turízta sira mai vizita nasaun ne’e.
Faze dahuluk projetu ne’e, empreza sei hahú konstrusaun hodi hein Governu rezolve okupante iha área Tasi-Tolu, hafoin empreza kontinua projetu faze daruak.
“Ami planu otél boot fitun lima ne’e iha Tasi Tolu, maibé agora okupante sei iha ne’ebá. Agora ami hein Governu rezolve okupante sira no presiza mós Governu aprovasaun akordu investimentu atu fasilita ami hahú projetu,” nia hatutan.
Tuir planu, Pelican Paradise Group, Lda sei halo dezenvolvimentu turíztiku ho investimentu hamutuk ho montante millaun $700.
Área dezenvolvimentu turíztiku ne’e tuir planu sei harii iha rai ektare 558, iha zona entre Tasi Tolu no Tibar, ne’ebé sei inklui unidade otelaria, kampu golf, lote rezidensiál, sentru dezenvolvimentu ba joven sira, eskola internasionál ida, ospitál ida no sentru komersiál.
Dezenvolvimentu ne’e sei permite kriasaun kampu traballu ba ema 1.500 iha faze konstrusaun no 1.300 kampu traballu permanente.
Jornalista: Florêncio Miranda Ximenes
Editora: Julia Chatarina
