DILI, 02 fevereiru 2021 (TATOLI)–Governu liuhosi Ministériu Finansa (MF) foin lalais halo ona aprezentasaun opsaun polítika-lejizlativa sira iha reuniaun Konsellu Ministru, ne’ebé hanesan baze rejime jurídiku foun atu simplifika prosesu aprovizionamentu kontratu públiku inklui ninia infrasaun sira.
“Sei halo alterasaun hotu kedas, ne’ebé ami sei halo dekretu-lei ida de’it atu labele iha konfuzaun, tanba daudaun iha barak, iha rejime espesiál, tanba ne’e utiliza ida de’it atu labele fó konfuzaun ba ema halo intrepretasaun,” Ministru Finansa, Rui Augusto Gomes, informa ba Agência TATOLI, foin lalais ne’e, iha Palásiu Governu.
Notísia relevante: Reuniaun KM: MF aprezenta rejime jurídiku simplifika prosesu aprovizionamentu
Daudaun ne’e, MF halo hela diskusaun no tuir planu sei aprezenta hikas ba Konsellu Ministru hodi hetan aprovasaun no sei submete ba Parlamentu Nasionál iha fevereiru nia laran.
“Ami prepara hela lei, ne’ebé fin fulan ne’e ami aprezenta ona ba Konsellu Ministru atu hetan aprovasaun,” nia informa.
Durante ne’e iha dekretu-lei 10 ne’ebé estabelese regra aprovizionamentu inklui prosedimentu sira, hanesan dekretu-lei númeru 01/2010 kona-ba altera rejime jurídiku aprovizionamentu, dekretu-lei númeru 02/2010 kona-ba prosedimentu espesiál atu fó kontratu konstrusaun sivíl to’o montante $250.000 ba empreza ne’ebé lokaliza iha postu administrativu sira.
Nune’e mós, dekretu-lei númeru 03/2010 kona-ba akompañamentu ba prosesu aprovizionamentu ho sekretariadu tékniku aprovizionamentu, dekretu-lei númeru 01/2005 kona-ba rejime jurídiku aprovizionamentu, dekretu-lei númeru 11/2005 kona-ba infraksaun administrativa ba rejime jurídiku aprovizionamentu no rejime jurídiku kontratu públiku.
Dekretu-lei númeru 12/2009 kona-ba rejime jurídiku kontratu públiku, dekretu-lei númeru 14/2001 kona-ba medida temporária ba aprovizionamentu, dekretu-lei númeru 14/2006 alterasaun rejime jurídiku ba aprovizionamentu, dekretu-lei númeru 15/2011 estabelesementu Komisaun Nasionál ba Aprovizionamentu no alterasaun ba dekretu lei númeru 10/2005.
Dekretu-lei 2011 kona-ba Ajénsia Dezenvolvimentu Nasionál (ADN), no dekretu-lei númeru 24/2008 ne’ebé altera rejime jurídiku aprovizionamentu.
Jornalista: Antónia Gusmão
Editora: Julia Chatarina
