DILI, 08 fevereiru 2021 (TATOLI)-Diretór Ezekutivu Lalenok ba Ema Hotu (LABEH), Christopher Henry Samson, hateten Timor-Leste ninia luta kontra korrupsaun hahú di’ak iha nivel globál.
Christopher Henry Samson, dehan tuir persesaun índise korrupsaun 2020 ne’ebé fó sai iha janeiru, tinan ne’e, hosi Transparénsia Internasionál kona-ba Índise Persesaun Korrupsaun (Corruption Perceptions Index-CPI) hatuur Timor-Leste (TL) iha pozisaun 86 ho pontu 40 (sa’e pontu 2) hosi totál nasaun 180.
Notísia Relevante : Index korrupsaun mundiál 2020, TL okupa ranking 86
Nia dehan, iha 2019 TL hetan pontu 38 no tuur iha pozisaun 98, maibé ba 2020 sa’e pontu rua tan, nune’e hetan pontu 40 hodi tuur iha pozisaun 86 globalmente hamutuk ho nasaun sira hanesan; India, Maroco, Brukinafasu, Trinidad ka Tobago no Turkia.
Ba iha rejiaun Ázia no Pasífiku nian, TL iha pozisaun 16 iha Srilangka, Indonézia no Tailándia nia leten, enkuantu Nova Zelándia iha pozisaun ida, Singapura (2), no Austrália iha pozisaun tolu.
“TL sai ona hosi kór-mean ba kór-laranja hodi tuur iha pozisaun Transparency Internasionál iha 2020. Ida-ne’e hatudu, ita nia luta hasoru korrupsaun hahú di’ak iha nivel global,” Christopher Henry Samson, hateten, segunda ne’e, liuhosi konferénsia imprensa iha edifísiu Labeh, Comoro, Dili.
Nia esplika, indikadór hosi TL ninia luta hasoru korrupsaun hahú di’ak tanba mai hosi vontade polítika Estadu tomak ne’ebé aprova ona lei Medida Prevensaun no Kombate Korrupsaun (MPKK).
Atu aumenta ka mantén Timor-Leste ninia prestasaun di’ak ba luta kombate korrupsaun iha nivel globál, Christopher Henry Samson, enkoraja parte hotu iha nasaun ne’e presiza esforsu an hodi servisu maka’as liután ba iha implementasaun lei foun MPKK, liu-liu deklarasaun rikusoin bens atu halo prevensaun ba korrupsaun.
Jornalista : Nelson de Sousa
Editór : Francisco Simões
