DILI, 19 fevereiru 2021 (TATOLI)—Ministériu Saúde (MS) konsidera média iha papél importante atu fó-sai informasaun ba povu, nune’e bele simu vasina COVID-19 bainhira ai-moruk ne’e to’o iha Timor-Leste (TL).
Ho konsiderasaun ne’e maka, Ministériu Saúde hamutuk ho Organizasaun Mundiál Saúde (OMS) no Organizasaun Mundiál ba Fundu Emerjénsia Labarik nian (UNICEF) fó ona advokasia ba média-sira kona-bá vasinasaun COVID-19, ne’ebé hala’o iha salaun MS, Caicoli, sesta ne’e.
Notísia Relevante:OMS rekomenda tipu vasina AstraZeneca ba Timor-Leste
“Ita boot sira-nia papél maka kontribui hodi fó informasaun ba komunidade oinsá kompriende didi’ak, nune’e bele simu vasinasaun ne’ebé sei haforsa ita-nia imunidade kontra moras COVID-19,’’ Koordenadora Jerál Komisaun Nasionál Prevensaun COVID-19, Odete da Silva Viegas ko’alia ba jornalista hosi média nasionál-sira.
Odete rekoñese katak, serbisu la’ós fásil maibé susesu ne’ebé Timor-Leste atinji ona konta ho kontribuisaun ema hotu-hotu inklui média nune’e to’o ohin loron seidauk iha kazu grave no laiha kazu mate.
Tanba ne’e nia enkoraja jornalista sira atu kontinua asume papél importante ne’ebé iha hodi fó informasaun ne’ebé loos, hamate tiha informasaun falsu sira atu komunidade bele susesu iha vasinasaun ne’ebé sei to’o mai.
Tuir planu, iha semana oin MS ho parseiru-sira sei halo advokasia ba instituisaun Polísia Nasionál Timor-Leste (PNTL), FALINTIL Forsa Defeza Timor-Leste (F-FDTL), Ministériu Finansa (MF) no Ministériu relevante-sira seluk.
Iha fatin hanesan Reprezentante OMS iha TL, Arvind Mathur, hateten nasaun barak mak simu ona vasina COVID-19, hein katak Timor-Leste mós sei simu vasina ne’e iha fulan fevereiru to’o marsu.
Tanba ne’e, Arvind Mathur iha esperansa boot katak média ne’ebé involve mós iha ekipa ne’e sei serbisu makaas atu bele konvense komunidade liuhosi fó sai informasaun ne’ebé klaru no ema bele kompriende ho fásil hodi simu vasina ne’e.
Nia husu atu média sira esplika didi’ak kona-bá natureza hosi vasina AstraZeneca ne’ebé OMS rekomenda ona ba Governu katak vasina ne’e apropriadu liu ba kontestu Timor-Leste ne’ebé seguru, efetivu no kondisaun armazenamentu diak.
Parte OMS fó hanoin nafatin ba jornalista-sira atu proteze aan nafatin iha kobertura ba COVID-19 liuhosi kumpri rekomendasaun saúde públika hanesan mantein distánsia fízika, uza máskara, taka inus no ibun bainhira me’ar no fase liman beibeik.
Notísia Relevante:Governu sei sosializa vasinasaun AstraZeneca durante fulan rua
Jornalista: Felicidade Ximenes
Editór: Cipriano Colo
