DILI, 02 marsu 2021 (TATOLI)— Banku Dezenvolvimentu Aziátiku (ADB) liuhosi Fundu Emerjénsia Nasaun Unida ba Labarik (UNICEF), oferese ekipamentu médiku 800-resin ba Ministériu Saúde (MS), hodi apoia prevensaun COVID-19 iha Timor-Leste (TL).
Ekipamentu hirak ne’e kompostu hosi kama ba Intensive Care Unit (ICU) ospitál-nian, kama seluk ba ospitál, ventiladór ba ICU, oximentru ba pulsu, lámpada ultravileta ba sala esterilizasaun, termómetru infravermellu, laringoskópiu ba adultu no labarik-sira inklui luz ba imunizasaun.
Notísia Relevante:MS rejista tan ema rua pozitivu COVID-19, pasiente ida rekuperadu
“Orsamentu ne’ebé uza hodi sosa ekipamentu médiku hamutuk millaun $1.2,’’ Diretór ADB iha Timor-Leste, Sunil Mitra hateten ba jornalista-sira iha Ospitál Lahane, tersa ne’e.
Iha fatin hanesan Diretora Jerál Prestasaun Serbisu Saúde, Odete da Silva Viegas, hateten ekipamentu-sira ne’ebé Ministériu Saúde hetan sei ajuda tebes atu hatán ba situasaun COVID-19, liuliu ba kazu grave-sira.
Tuir Odete, ekipamentu ne’e iha kama 100 ne’ebé Ministériu sei tau kama 25 iha antiga Ospitál Lahane no kama 75 sei tau iha fatin atendimentu kazu lizeiru Tasi-tolu.
“Minsitériu Saúde nia-foku dahuluk iha atendimentu ba COVID-19. Tanba ne’e maka ita presiza liu ekipamentu hanesan ADB oferese ona,” Odete subliña.
Odete lori Governu-nia naran, agradese ba apoiu hirak ne’e, la’ós de’it ba ADB ho UNICEF maibé ba parseiru hotu-hotu.
Entretantu, Ministériu Saúde deside ona Vera Cruz hanesan sala izolamentu atu atende pasiente COVID-19 moderadu, kazu lizeiru tau iha Tasi-tolu no kazu grave tau iha antiga Ospitál Lahane.
Jornalista: Felicidade Ximenes
Editór: Cipriano Colo
