DILI, 14 abril 2021 (TATOLI)—Administradór Postu Administrativu Don Aleixo Munisípiu Dili, Tomas Barros, informa Postu Administrativu Don Aleixo Munisípiu Dili foin mak simu dadus provizóriu vítima dezastre naturál hosi xefe suku sira iha suku hitu (7) ne’e hamutuk 8.338.
“To’o ohin loron Postu Administrativu Don Aleixo simu lista dadus provizóriu ba inundasaun nian hosi ita-nia autoridade komunitária hosi suku hitu hamutukuma kain 8.338. Hosi totál xefe família ne’e fahe ba formatu rua, formatu ida ba lista afetadu inundasaun hamutuk uma kain 8.200 no formatu rua nian hamutuk 138,” Tomas Barros hateten ba Agência TATOLI iha nia knaar fatin, Postu Administrativu Don Aleixo, Fatuhada, Dili, kuarta ne’e.
Nia dehan, formatu ida kona-ba lista afetadu inundasaun ho nia totál uma kain 8.200 kompostu hosi Suku Bairru Píte iha uma kain 1.013, Bebonuk 374, Kampung Alor 1.394, Comoro 3737, Fatuhada 882, Manleuana 163, no Suku Madohi iha uma kain 637.
Kona-ba formatu rua, nia dehan, ne’e haree liu kona-ba estragu infraestrutura hanesan estrada monu no eskola balun estraga ne’ebé hamutuk 138 ne’e kompostu hosi Suku Bairru Pite hamutuk 10, Bebonuk 17, Kampung Alor 50, Comoro 44, Fatuhada 17, Suku Manleuana no Madohi la estraga buat ida.
“Lista dadus provizóriu ba vítima afetadu inundasaun ne’e, ita seidauk bele submete ba Prezidente Autoridade Munisípiu Dili tanba ekipa sei kontinua rekolla no halo baze dadus ba dadus sira ne’e. Maibé ha’u fiar katak tempu badak bele entrega ona, nune’e parte relevante bele prosesu ona,” nia dehan.
Administradór ne’e hatutan, maske iha ona lista dadus vítima inundasaun provizóriu maibé sei kompleta tan tanba xefe aldeia sira sei halo identifikasaun ba sasán estragu iha terrenu.
“Ita sei tarde uituan, tanba ita fó tempu ba xefe aldeia sira hodi observa no rekolla dadus tama-sai uma, nune’e dadus bele apar no bainhira halo apoiu ruma hosi Governu karik labale mosu fallansu,” nia hateten.
Tanba, nia hateten, dadus ne’e presiza iha evidénsia ruma tanba ezemplu iha lista ne’e hateten uma lakon totál maibé bainhira Governu ba halo observasaun ka identifikasaun mak la tuir dadus, ne’e bele hamosu buat seluk ida. Tanba ne’e, xefe aldeia sira tenke servisu ho kuidadu, rigór, no rekolla ho hasai fotografia hanesan evidénsia.
Maske xefe aldeia no xefe suku sira rekolla dadus loron tolu ona, hahú segunda-kuarta (12-14/04) maibé seidauk bele finaliza tanba populasaun barak mak afetadu ba dezastre naturál nune’e presiza haree ho didiak. Tanba, nia dehan, Governu liuhosi MAE haruka formatu tolu ba xefe suku sira, entaun presiza tempu mak bele halo hotu.
“Ita presiza fó tempu ba xefe suku no xefe aldeia sira tanba formatu ne’e la fasil atu foti iha loron ida-rua nia-laran. Tanba, kada formatu ne’e mensiona iha ne’ebá dehan formatu dahuluk rekolla dadus afetadu bazea ba estragu hanesan estragu totál, natón no ladún. Depois formatu daruak mak kona-ba infraestrutura, ezemplu, estrada kotu ka monu ka mota lori, drainajen aat, eskola eh kapela aat ka sobu hosi udan anin, sede suku bee tama no seluk tan,” nia esplika.
Iha formatu ikus, nia dehan, ko’alia kona-ba ema ne’ebé halo negósiu, hanesan loza, kioske, faan sasán iha merkadu mak mota lori no estragu sasán ruma iha kioske laran ne’e presiza haree no kuidadu mak bele rekolla.
Nia hateten, bazea ba orientasaun hosi Governu Sentrál nian katak horisehik (13/04) ne’e hatama ona dadus maibé Postu Administrativu Dom Aleixo seidauk bele tanba populasaun barak no sasán estragu mós barak, entaun ekipa iha terrenu sei rekolla no bainhira ramata ona mak entrega ba Prezidente Autoridade Munisípiu Dili.
Jornalista: Osória Marques
Editór: Cancio Ximenes
