DILI, 19 abríl 2021 (TATOLI) – Ministru Edukasaun, Juventude no Desportu (MEJD), Armindo Maia, simu ona dadus kona-ba kondisaun eskola hitu (7) ne’ebé hetan estragu maka’as no presiza hadi’a ka halo reabilitasaun.
Eskola hirak ne’e maka hanesan Eskola Sekundáriu Jerál 5 de Maio, Eskola Sekundáriu Jerál Sergio Viera de Melo, Eskola Sekundáriu Jerál 04 Setembru UNAMET, Balide, Eskola Báziku Sentrál (EBC) Manleuana, Eskola Baziku Filial (EBF) Fatuhada, EBF Casnafar, Eskola Sekundáriu Tékniku Vokasionál (ESTV) Hera.
Notísia Relevante : Inundasaun estraga eskola 14 iha Dili, Baucau ida no Liquiça ida
MEJD Armindo Maia hateten, iha tempu badak nia sei aprezenta situasaun sira ne’e ba Komisaun G Parlamentu Nasionál ba asuntu Edukasaun, Juventude, Kultura no Sidadania para bele aprezenta proposta ba Komisaun C ne’ebé trata asuntu Ekonomia no Finansas.
“Ha’u husu ba dirijente eskola sira hotu iha Dili ne’ebé afetadu ba inundasaun inklui mós munisípiu balun ne’ebé tama iha risku inundasaun, foin lalais ne’e, atu halo levantamentu dadus para ha’u bele aprezenta bá Komisaun G PN,” Ministru Armindo Maia hateten ba dirijente eskola-sira iha ámbitu lansamentu distribuisaun rezumu matéria ba alunu-sira ne’ebé realiza iha eskola EBF Balibar, segunda ne’e.
Nia dehan dadus ne’ebé mak Ministériu presiza tenke transparénsia. Signifika eskola ne’ebé mak hetan inundasaun iha loron 4 abríl, foin lalais ne’e, tenke alista ninia gravidade kona-bá saida de’it mak hetan estragus atu nune’e MEJD bele relata bá Komisaun G PN.
MEJD rasik iha prevee ona iha fundus infrastrutura atu halo konstrusaun ba eskola 221 ho sala de aulas 600-resin no prosesu ba konstrusaun ne’e rasik submete ona bá Ministériu Obras Públika (MOP).
Jornalista : Tomé Amado
Editór : Francisco Simões
