DILI, 19 abríl 2021 (TATOLI)—Pasiente COVID-19 na’in-rua iha kuarentena Polo, Munisípiu Covalima, lakohi koopera ho ekipa médiku atu submete ba izolamentu, to’o hakanek médiku ida iha parte oin suku pontu rua.
Diretór Saúde Munisípiu Covalima, Filipe Pereira Lemos, hateten insidente ne’e akontese iha tuku 18:00 otl, bainhira ekipa médiku hakarak atu evakua pasiente na’in-rua ne’e tanba rezultadu teste hatudu pozitivu COVID-19.
Notísia relevante:Komandu hein relatóriu atuasaun polísia iha kuarentena Covalima
“Iha estudante na’in-rua pozitivu, ita atu lori ba izolamentu maibé sira ne’ebé hela hamutuk iha kuarentena mak la autoriza,” Filipe Pereira Lemos hateten ba jornalista Agência Tatoli, via telefónika, segunda ne’e.
Ho situasaun ne’e, nia hatutan, ekipa vizilánsia fó informasaun katak pasiente la koopera, nune’e diretór ne’e kontaktu kedan ho Administradór Munisípiu Covalima no mós Komandante PNTL Munisipál, atu reforsa hodi fó esplikasaun ruma, nune’e bele konvense.
“Bainhira, komandante PNTL to’o iha kuarentena, estudante-sira halai hotu ba kuartu laran no xave tiha odamatan ho janela hodi hakilar dehan ami la’ós na’ok teen, ami mesak veteranu-nia oan,” nia konta tuir.
Maski nune’e, Komandante PNTL Covalima haruka ekipa vizilánsia na’in-rua mak tama ba bolu, maibé sira tuda hosi kuartu laran no kona médiku ne’e iha parte oin to’o ran sai makaas.
“Ita-nia pesoál saúde na’in-rua mak ba hamrik besik janela no bolu atu sai mai, maibé ema balun iha laran kaer ai rohan-ruma mak tuda ka tebe janela, nune’e vidru haksoit kona kedan médiku ne’e nia-oin,’’ diretór ne’e subliña.
Hafoin akontesimentu, pasiente na’in-rua ne’e sai mai kedan no lori ba izolamentu, médiku ne’e mós ekipa lori kedan ba Ospitál Referál Covalima, hodi halo tratamentu no hetan suku pontu rua iha oin.
Tuir dadus hosi parte saúde Munisípiu Covalima katak, estudante-sira ne’ebé kumpre kuarentena iha Polo hamutuk 45 ne’ebé mai hosi Dili ho dalan ilegál no laiha autorizasaun hosi Sala Situasaun Sentru Integradu Jestaun Krize (SIJK), inklui laiha rezultadu teste swab.
Bainhira iha kuarentena, ekipa saúde halo teste swab, rezultadu hosi na’in 45 ne’e na’in 13 mak pozitivu no na’in 32 ne’e kontinua nafatin kumpre kuarentena to’o loron 14.
Tuir loloos, aban estudante na’in 32 ne’e bele fila ona ba uma, nune’e horisehik ekipa saúde halo teste swab fila-fali, rezultadu iha na’in-rua mak pozitivu.
Oras ne’e daudaun, pasiente na’in-rua ne’e kumpre hela regra vizilánsia iha kuarentena no sei ba izolamentu, bainhira pasa hosi COVID-19 sei kontinua responsabiliza atuasaun ne’ebé sira halo iha Polisia.
Jornalista: Felicidade Ximenes
Editór: Cipriano Colo
