LIQUIÇA, 29 abríl 2021 (TATOLI) – Ministériu Solidariedade Sosiál no Inkluzaun (MSSI) Munisipiu Liquiça, oferese materiál eskola nian ba estudante ne’ebé afetadu hosi inundasaun iha 04 abríl liubá, iha Suku Tibar, Postu Administrativu Bazartete, Munisipiu Liquiça.
Notísia Relevante : MSSI Liquiça distribui ai-han ba labarik-sira iha Tibar ho Ulmera
Sasán hirak ne’ebé fahe mak hanesan kadernu, lapizeira, lapis kór no kadernu dezeñu. Tékniku MSSI Postu Administrativu Bazartete, Ivonia Julmira Maria dos Santos hateten, sasán ne’ebé fahe ba labarik-sira tanba MSSI Liquiça servisu hamutuk ho Komisaun Nasionál Direitu ba Labarik.
“Ami mai fó tan sasán eskola nian ba labarik-sira. Ita hatene foin lalais inundasaun estraga komunidade nia uma barak, inklui labarik sira-nia sasán hanesan livru, kadernu no seluk tan, estragu hotu. Ida ne’e mak ami servisu hamutuk ho Komisaun Direitu Labarik haruka sasán hirak ne’e mai MSSI Munisípiu ohin hodi distribui ba labarik sira-ne’e,” dehan Ivonia hateten ba Agência Tatoli iha Tibar, kinta ne’e.
Total labarik ne’ebé simu sasán hirak ne’e hamutuk 115 no total uma-kain 69 no apoiu hosi MSSI ba labarik afetadu sira dala rua ona. Iha faze primeiru oferese ai-han ba labarik idade 0-5 no ohin oferese materiál eskola ba labarik eskola-sira.
Xefe Suku Tibar, Bento Correia da Conceição, agradese ba MSSI ne’ebé apoiu ona nesesidade báziku ba estudante afetadu sira.
“Ami agradese tebes ba MSSI ne’ebé laran luak ajuda ona ami Tibar, liuliu ohin estudante-sira nia kadernu no seluk tan,” Bento hateten.
Iha fatin hanesan, inan hosi oan ne’ebé simu materiál hirak ne’e, Marciana Pereira agradese ba MSSI ne’ebé apoiu ona sira-nia oan ba dala rua durante sira enfrenta situasaun difisil kalamidade ne’e.
“Agradese tebes maski sasán la barak no uitoan bele tulun ona ami nia oan. Ha’u iha oan ida agora klase segundu anu,” Marciana hateten.
Jornalista : Hortencio Sanchez
Editór : Francisco Simões
