DILI, 02 maiu 2021 (TATOLI)—Sala Situasaun-Sentru Integradu Jestaun Krize (SS-CIGC, sigla portugés) atualiza informasaun COVID-19 pur eskrita, ne’ebé hatudu katak kazu detetadu ohin loron hamutuk 48, rekuperadu 26, nune’e kazu ativu hamutuk 1.260, ne’ebé daudaun baixa iha sala izolamentu.
“Hosi kazu detetadu foun 48, deteta iha Dili 46 no munisípiu seluk rua, enkuantu hosi totál ne’e kompostu hosi mane 32 no feto 16,” Koordenadór Forsa-Tarefa ba Prevensaun no Mitigasaun Surtu COVID-19, Rui Maria de Araújo, esplika liuhosi nota imprensa ne’ebé Agência TATOLI asesu, domingu ne’e.
Nune’e mós, hosi kazu detetadu foun ohin, tinan 12 mai kraik ida, idade entre 12-59 na’in-45 (93,7%) no idade 60 ba leten na’in-rua no kazu foun ohin maioria asintomátiku (100%).
“Kazu foun ohin, 15 (31,2%) detetadu pozitivu tanba halo teste ho razaun atu halo viajen ka halo ona viajen ba munisípiu ka estranjeiru,” nia akresenta.
Ho kazu detetadu ohin, totál kazu rejistadu iha Timor-Leste hahú marsu 2020 to’o agora hamutuk 2.444.
Hosi horiseik mai ohin, Laboratóriu Nasionál Saúde hasai teste Polymerase Chain Reaction (PCR) hamutuk 579 iha munisípiu Dili, kompostu hosi vijilánsia sentinela 36, rastreiu ba kontaktu (contact tracing) 87, rastreiu aleatóriu (random screening) 137, viajen sai hosi serka sanitária munisípiu Dili 306, viajen internasionál haat, no follow up iha kuarentena hamutuk sia.
Enkuantu, teste PCR hosi sábadu horiseik (01/05) hasai iha munisípiu sira hamutuk 257, kompostu hosi Baucau 111, Maliana 19, Maubisse 124 no Viqueque tolu, no teste follow up iha izolamentu hamutuk 48, ne’ebé hatudu katak 24 negativu ona no 24 nafatin pozitivu.
Iha loron 25 abríl, SS-CIGC deklara Dili tama ona transmisaun komunitária tuir klasifikasaun hosi Organizasaun Mundiál Saúde (OMS) tanba haree kapitál nasaun ne’e deteta da’et maka’as no númeru pozitivu aumenta kada loron.
Aleinde ne’e, ba bazu detetadu ohin loron, na’in-23 halo tratamentu iha izolamentu Vera Cruz, ne’ebé iha área obstetrisia na’in-lima, sirurjia ida, medisina interna na’in-14, no pediatria haat.
Sira na’in-lima iha obstetrisia ho kategoria moderadu hotu no kondisaun estável, enkuantu na’in-14 iha medisina interna iha na’in-hitu maka grave no hitu moderadu, enkuantu hosi grupu grave, ida uza ventiladór, na’in-neen seluk uza oxijéniu.
Hosi kazu haat iha pediatria, rua ho kondisaun moderadu no ida grave, ne’ebé ida ho kondisaun grave uza CPAP no tolu ho kondisaun moderadu la uza ona oxijéniu.
Kazu detetadu COVID-19 ne’ebé baixa iha izolamentu Vera Cruz iha loron 12 abríl, ho sindroma insufisiénsia respiratória aguda hahú kedas uza ventiladór desde loron tama izolamentu, maibé hahú ohin transfere ona ba Unidade Kuidadus Intensivus Hospital Nasional Guido Valadares (HNGV) no oras ne’e sei nafatin hala’o ventilasaun asistida.
Pasiente ne’e ninia teste PCR hatudu ona rezultadu negativu dala-tolu tutuir malu (loron 23, 24 no 25 abríl), maibé sei nafatin uza ventilador liuhosi trakeostomia.
Jornalista: Natalino Costa
Editora: Julia Chatarina
