DILI, 06 maiu 2021 (TATOLI) – Ministériu Edukasaun Juventude no Desportu (MEJD) distribui, kinta ne’e, iha edifísiu MEJD, Vila Verde, Dili, ekipamentu ka materiál limpeza ho nesesidade báziku ba Eskola Báziku tolu iha Dili mak hanesan Eskola Báziku Sentrál (EBC) Manleuana, Eskola Báziku Filiál (EBF) Casnafar no Eskola Báziku Filiál (RBF) Beduku.
Vise-Ministru Edukasaun Juventude no Desportu, António Guterres, hateten materiál limpeza ne’ebé MEJD distribui ne’e oferese hosi povu Austrália tanba Austrália iha kompromisu hakarak apoiu nafatin Governu Timor-Leste iha area edukasaun.
totál materiál limpeza ne’ebé MEJD simu hosi povu Austrália atu distribui ba eskola-sira mak hanesan Karrosa 31, Kanuru boot 36, Enxada 20, Garfu 31, Balde (10 litru) 35, Karau-dikur 35,v máskara dos 18, Luvas 700 (pcs).
Iha mós apoiu nesesidade bázika mak hanesan foos 25 kg saka 24, Supermie kaixa 33, Mina 5 litru masa neen (6), DEHO kaixa sia (9), Masin Kaixa haat (40), Bee-hemu (kopu) kaixa 20 no bee tanki atu fase eskola.
“iha okaziaun ida ne’e ha’u lori Ministériu Edukasaun nia naran hato’o agradese ba Governu Austrália liuliu ba Embaixadór Australia ho ninia ekipa sira iha TL ne’ebé fó ona apoiu no kontribuisaun boot ba edukasaun TL iha ámbitu COVID-19,” António Guterres hateten.
António Guterres afirma katak apoiu materiál hosi povu Austrália ne’ebé ohin MEJD distribui ona bá eskola tolu ne’e hodi fasilita profesór-sira no komunidadi ne’ebé hela besik iha area eskola atu tulun malu hodi halo limpeza bá eskola sira. tanba eskola tolu ne’e kategoria grave tebes. Tan ne’e MEJD desidi distribui uluk materiál sira ne’e ba sira hodi hein to’o bainhira governu desidi hapara konfinamentu obrigatóriu parte eskola bele organiza limpeza sira.
António Guterres husu mós bá diretora ho koordenadór EB tolu ne’ebé simu materiál ne’e atu kontinua jere ho didi’ak, nune’e Governu deklara hapara konfinamentu obrigatóriu karik, bele utiliza ekipamentu sira ne’e hodi halo limpeza.
Diretór EBC Maneluana, Rosa Auta Marcal da Cruz, hateten sira-nia parte sei kuidadu ekipamentu emerjénsia ne’ebé povu Austrália oferese ona ba sira liuhosi MEJD atu jere ba interese eskola.
Jornalista : Tomé Amado
Editór : Francisco Simões
