LIQUIÇA, 15 maiu 2021 (TATOLI) –Grupu Asosiasaun Reforsa Dezenvolvimentu Nasionál (SAZENA) Munisipiu Liquiça, husu ba Governu liu-liu Ministériu Finansas atu suspende provizóriu atividade depózitu kréditu (depósito de crédito) hosi instituisaun finanseiru-sira ne’ebé fasilita kréditu ba negosiante-sira.
Notísia Relevante : Serka sanitária, negosiante 80-resin iha Leorema difisil atu devolve osan kréditu
“Ami husu ba Ministériu Finansas hato’o pedidu rezolusaun ida ba Konsellu Ministru hodi suspende provizóriu atividade depózitu kréditu hosi banku ka instituisaun finanseiru-sira ba negosiante-sira tanba ho situasaun pandemia COVID-19, serka sanitária no Estadu emerjénsia halo negosiante-sira susar tebes atu hetan rendimentu,” portavós SAZENA, Abilio dos Santos Mendes, hateten liuhosi konferénsia imprensa iha Liquiça, sábadu ne’e.
Maioria negosiante-sira iha Liquiça durante ne’e foti kréditu iha instituisaun finanseiru-sira, hanesan Banku Nasional Komérsiu Timor-Leste (BNCTL), Kaebauk no Moris Rasik. Nune’e, kada semana no kada fulan negosiante-sira tenke kumpre sira-nia obrigasaun kona-ba depózitu kréditu.
“Ami haree negosiante-sira iha Liquiça barak mak kréditu, maibé serka sanitária no Estadu emerjénsia ida-ne’e halo sira la hetan osan, maske nune’e kada semana ka kada fulan, sira tenke devolve osan ne’ebé sira kréditu,” Abilio dos Santos Mendes hateten.
Notísia Relevante : Negosiante-sira iha Liquiça susar ba beibeik
Nia dehan, sidadaun barak obrigadu tenke kontra regra Estadu Emerjénsia no serka sanitária tanba buka osan hodi selu sira-nia kréditu ne’ebé semana-semana ema mai ezije.
SAZENA husu ba Primeiru-Ministru Taur Matan Ruak atu buka medida ida hodi orienta ba Ministru Finansas, solusiona negosiante sira-nia halerik no sofrimentu ne’ebé sira enfrenta kada loron.
Iha fatin hanesan negosiante Manuela Carvalho hateten, nia triste tanba kada semana Instituisaun Finanseira Moris Rasik sempre tuir nia hodi ezije selu osan.
“Kada semana, Moris Rasik mai tuir ona ha’u. Ha’u fa’an modo iha merkadu ne’e maibé loron ida ha’u hetan de’it $1.00 to’o $2.00 no kada semana tenke hatama $10.00 ba Moris Rasik. Ami susar tebes atu hetan osan uitoan ba han-hemu mós difisil tebes,” nia hateten.
Jornalista : Hortencio Sanchez
Editór : Francisco Simões
