DILI, 26 maiu 2021 (TATOLI)—Reuniaun Konsellu Ministru (KM) iha kuarta ne’e, asiste aprezentasaun hosi Diretór Ezekutivu Agência Tecnologia da Informação e Comunicação, Institutu Públiku (TIC) TIMOR, I.P no Prezidente Komisaun Téknika Eventuál, Roberto Caetano de Sousa Vicente, kona-ba sistema Identifikasaun Únika ka ID Únika.
Ministru Prezidénsia Konsellu Ministru, Fidelis Manuel Leite Magalhães, hateten, aprezentasaun ne’e refere liu ba estratéjia integrada ba implementasaun sistema ne’ebé tuir planu sei hahú funsiona iha tinan oin.
“Estratéjia ne’e sei implementa entre tinan 2021 to’o 2025, ne’ebé prevee katak rejistu dahuluk sei realiza iha trimestre dahaat tinan 2022, ne’ebé iha tinan ikus bele rejista ona ema millaun ida,” Ministru Fidelis relata hafoin ramata reuniaun ezekutivu, iha salaun Ministériu Finansa, Aitarak-laran.
Tuir Portavóz Governu, sistema Identifikasaun Úniku ba sidadaun sira ne’e halo parte iha programa Reforma Administrasaun Públika no nu’udár baze importante atu hadi’a prestasaun efetiva, efisiénsia no planeamentu servisu públiku.
Nune’e mós, bele asegura jestaun no koordenasaun polítika sosiál ne’ebé di’ak, no iha tempu hanesan permite kontribui ba konstrusaun estruturada governasaun eletrónika iha Timor-Leste.
ID Únika ne’e sei uza dadus dijitál kiik lubun ida, hodi estabelese identidade dijitál ida, ne’ebé sei atribui númeru identifikasaun únika ne’ebé kria sein kritériu definidu ruma.
Nune’e sistema ne’e sei iha informasaun biográfika kiik lubun ida, hanesan naran, data no fatin moris, ne’ebé informasaun hirak sei uza atu atende nesesidade atu komprova identidade no konformidade, hanesan inskrisaun ba servisu no pagamentu inklui loke konta bankária.
Aleinde ne’e, sei uza mós informasaun biométrika, ba ema ne’ebé ho tinan 13 ba leten, hodi estabelese singularidade individuu no fasilita autentikasaun segura hosi identidade únika ida.
Jornalista: Antónia Gusmão
Editora: Julia Chatarina
