DILI, 01 juñu 2021 (TATOLI)—Polísia Nasionál Timor Leste (PNTL) Komandu munisípiu Viqueque, detein ona suspeitu na’in-sanulu ne’ebé deskonfia envolve iha kazu tuda karreta ambulánsia iha postu administratviu Uatucarbau, munisípiu Viqueque.
Portavóz Komandu Jerál PNTL, Superintendente Xefe, Arnaldo de Araújo, esplika kronolojia kazu tuda karreta ambulánsia ne’e akontese iha 30 maiu 2021.
Notísia relevante:Ema tuda ambulánsia ho ekipa saúde iha Uato-Lari
Arnaldo de Araújo hatutan, bainhira ambulánsia atu ba tula pasiente balun iha postu administrativu Uatucarbau, derrepente grupu ida tuda hasoru ambulánsia ne’ebé halo motorista no médiku-sira trauma.
Hafoin akontesimentu, PNTL to’o kedan fatin hodi halo detensaun ba suspeitu na’in-sanulu, identifika mós suspeitu na’in-tolu mak deskunfia forte envolve iha kazu ne’e.
“Suspeitu sira hamutuk na’in-sanulu, maibé polísia investiga arguidu na’in-tolu mak deskonfia envolve iha kazu ne’e,” Arnaldo de Araújo hateten ba jornalista-sira iha Komandu PNTL, Caicoli, tersa ne’e.
Iha kuarta 05 maiu 2021, ema deskoñesidu tuda rahun mós ambulánsia iha área suku Afaloicai, postu administrativu Watulari, munisípiu Viqueque.
Jornalista: Eugénio Pereira
Editór: Cipriano Colo
