DILI, 02 juñu 2021 (TATOLI)—Xefe Estadu Maiór Jenerál FALINTIL-Forsa Defeza Timor-Leste (F-FDTL), Tenente Jenerál Lere Anan Timur, kuarte ne’e relata lei defeza nasionál no rekrutamentu Falintil-Forsa Defeza Timor-Leste (F-FDTL) ba Prezidente Repúblika, Francisco Guterres Lú Olo.
Notísia Relevante: Kandidatu ne’ebé naran liu selesaun dokumentu vaga F-FDTL haree iha kada munisípiu
“Ohin, hasoru malu ho Prezidente Repúblika, Francisco Guterres Lú Olo, hodi ko’alia kona-ba lei defeza nasionál, ne’e signifika katak ami ko’alia liu ba aspeitu no fatin militá ninian. Entaun, ami ko’alia kona-ba rekrutamentu ne’ebé ita hotu hatene katak, ohin hahú halo inspesaun ka teste saúde no fíziku ba kandidatu sira, nune’e bele tama ba vida militár,” Tenente Jenerál Lere Anan Timur informa ba jornalista sira, hafoin hasoru malu ho Prezidente Repúblika iha Palásiu Prezidensiál Nicolau Lobato, Bairru Pite, Dili, kuarta ne’e.
Tuir nia, ultimu rekrutamentu ba F-FDTL hahú kedas iha 2015 to’o agora ne’e halo tinan neen (6), tanba ho razaun impase politika no pandemia COVID-19 no tanba ida-ne’e mak foin 2021 mak hahú fali halo rekrutamentu ba F-FDTL.
Maibé hanesan uluk haktuir katak, iha planu estratejiku 2020 ne’e haeten katak iha 2020 ne’e F-FDTL atinje ona númeru autorizadu 3.600, maibe to’o agora seidauk atinje to’o ne’eba.
Foufoun rekrutamentu ne’e halo koordenasaun ho Governu hodi deside katak rekrutamentu ba F-FDTL ne’e presiza ema 1.200 ne’ebé fahe ba primeiru turnu ne’e ema na’in-600 no segundu turnu ne’e ema na’in-600.
“Uluk ami husu ba Governu no Governu aseita hodi rekruta 1.200, ba primeiru turnu 600 no segundu turnu ba 600. Maibé, tanba situasaun no konjuntura oioin mak ita rekruta de’it 600. Iha balun ne’ebé kestiona kona-ba idade no ami tau duni idade tinan 30 ne’e másimu, tanba presiza 1.200. Maibé tanba Governu autoriza de’it 600 entaun ami hatun fali ba idade 26,” Tenente Jenerál Lere haktuir.
Ho nune’e, hosi kandidatu 2.400 ne’ebé tuir teste ne’e ema na’in-600 mak liu no hafoin tuir teste fíziku no saúde ramata, to’o loron 40 nia laran mak foin anunsíu kandidadtu sé-sé mak merese liu no sé-sé mak la liu.
Notísia Relevante: Kandidatu 2.400 pasa iha selesaun dokumentu ba vaga F-FDTL
Jornalista: Osória Marques
Editór: Cancio Ximenes
